کراچی میں 61 کروڑ روپے لاگت کے مزید تین اہم منصوبوں کے ٹینڈر کھل گئے ہیں۔ جنگ نیوز کے مطابق محکمہ بلدیات حکومت سندھ کے سالانہ ترقیاتی پروگرام کے تحت نارتھ کراچی میں خواجہ اجمیر نگری تا ناگن چورنگی براستہ ا نڈہ موڑسڑک کی بحالی اور بہتری کے منصوبے کی تخمینی لاگت 44 کروڑ 39 لاکھ46 ہزار روپے ہے۔
دوسری اہم اسکیم میٹروپول تاائرپورٹ شاہراہ فیصل پرپیپلز بس سروس کے روٹ پر گڑھوں کی بھرائی ہے اور اس کے لئے 12 کروڑ5 لاکھ 55 ہزارروپےرکھے گئے ہیں۔ تیسری اہم اسکیم کراچی ٹریفک سگنلزکی تنصیب، اپ گریڈیشن و مرمت کا کام ہے اس پر 4 کروڑ84 لاکھ 51 ہزار 4 سو25 روپے خرچ ہوں گے۔
میڈیا رپورٹ کے مطابق کراچی ڈیولپمنٹ اتھارٹی جو ان اسکیموں کو مکمل کرے گی اس سلسلے میں قائم کی گئی۔ پروکیورمنٹ کمیٹی نے گزشتہ دو روزکے دوران تما م ٹینڈرز سوک سینٹر کے سیمینار ہال میں ٹھکیداروں کے سامنے اوپن کئے، اس حوالے سے ڈائریکٹر جنرل کے ڈی اے الطاف گوہرمیمن نے سختی سے ہدایت جاری کر رکھی تھی کہ جس ٹھکیدار کی بولی سب سے کم اور تکینکی مراحل پورے ہوں اسے اسی دن سب کے سامنےٹھیکہ ایوارڈ کیا جائے۔ مذکورہ اسکیموں پر آئندہ چند روز میں کام کا آغاز ہو جائے گا۔
