پاکستان کی اداکارہ و ماڈل نازش جہانگیر نے انکشاف کیا ہے کہ چند سال قبل کراچی کے علاقے ماڈل کالونی کے قریب گر کر تباہ ہونے والے طیارے میں ان کا بھی ٹکٹ تھا لیکن خوش قسمتی سے وہ جا نہ سکیں تھیں۔
ایک پوڈ کاسٹ میں انٹرویو دیتے ہوئے نازش جہانگیر نے انکشاف کیا کہ 2020 میں جو پی آئی اے کا طیارے کراچی میں تباہ ہوا اس میں ان کا بھی ٹکٹ تھا، تباہ ہونے والے طیارے میں انہیں بھی کراچی آنا تھا لیکن بعض وجوہات کی بنا پر ان سے پرواز چھوٹ گئی تھی۔ انہوں نے شکر ادا کرتے ہوئے کہا کہ حادثہ کا سننے کے بعد انہوں نے شکر ادا کیا کہ وہ نہیں گئیں۔
پروگرام میں بات کرتے ہوئے نازش جہانگیر نے بتایا کہ ان سے متعدد وجوہات کی بنا پر پروازیں چھوٹ جاتی ہیں، وہ کوشش کرتی ہیں کہ ایسا نہ ہو لیکن اس کے باوجود ان سے متعدد پروازیں چھوٹ جاتی ہیں۔ انہوں نے انکشاف کیا کہ ایک ہی دن میں ان سے 6 پروازیں بھی چھوٹیں جو کہ اسلام آباد سے کراچی کی تھیں اور ہر بار کوشش کے باوجود وہ وقت پر نہیں پہنچ پا رہی تھیں۔
واضح رہے کہ کراچی میں مئی 2020 میں پاکستان انٹرنیشنل ایئرلائن (پی آئی اے) کا طیارہ لینڈنگ کے وقت گر کر تباہ ہوگیا تھا جس میں تقریبا 100 افراد جاں بحق ہوئے تھے۔ پی آئی اے کا طیارہ کراچی میں آبادی پر گرا تھا، جس وجہ سے گھروں کو بھی نقصان ہوا تھا اور گھروں میں موجود چند افراد بھی جاں بحق ہوئے تھے۔
