کراچی میں پولیس کی وردی میں ملبوس ڈاکو شہری سے 2 ہزار ڈالر چھین کر فرار ہوگئے۔ تفصیلات کے مطابق کراچی میں پولیس وردی پہنے ملزمان وارداتیں کرنے لگے ہیں۔ شارع پاکستان ہاشم شاپنگ سینٹرکےقریب پولیس وردی میں ملبوس2ملزمان شہری سے2ہزار ڈالرچھین کر فرار ہوگئے۔ واردات کا مقدمہ گلبرگ تھانے میں درج کرلیا گیا۔
رپورٹ کے مطابق گلبرگ تھانے کے علاقے فیڈرل بی ایریا بلاک 13 میں ہونے والی اس واردات کامقدمہ متاثرہ شہری کی مدعیت میں 2 نامعلوم مسلح ملزمان کے خلاف درج کرکے تفتیش انویسٹی گیشن پولیس کے سپرد کردی گئی۔ متاثرہ شہری نے پولیس کو بتایا کہ شارع پاکستان ہاشم شاپنگ سینٹر کے قریب پولیس وردی میں ملبوس 2 ملزمان نے اسے تلاشی کے بہانے روکا اورتلاشی کے دوران میرے پاس موجود 2ہزارڈالرچھین لیے۔
شہری کے مطابق دستگیر میں واقع بینک سےاپنے بھائی رفیق کے اکاؤنٹ سے 2 ہزار امریکی ڈالر نکالے اور کرنسی تبدیل کرنے کے لیے شارع پاکستان ہاشم شاپنگ سینٹر کے قریب واقع منی ایکسچینج جا رہا تھا کہ ہرے رنگ کی گاڑی میں سوار پولیس وردی میں ملبوس 2 ملزمان نے2 ہزار ڈالر چھینے اور گاڑی واٹر پمپ کی جانب دوڑا دی۔ شہری سے لوٹ مار کا یہ واقعہ 12 دسمبر کو پیش آیا تھا۔
