-
-
وفاقی تحقیقاتی ادارے (ایف آئی اے) کے امیگریشن سرکل نے کراچی ایئر پورٹ سے عمرہ ویزے پر سعودی عرب جانے والے مسافر کو گرفتار کر لیا ہے۔ ایف آئی اے حکام کے مطابق سعویہ جانے والا مسافر پاسپورٹ میں جعلسازی کر کے ملازمت کی غرض سے سعودی عرب جا رہا تھا۔
ایف آئی اے حکام کے مطابق مسافر محمد مزمل عمرے کے ویزے پر سعودی عرب کا سفر کر رہا تھا، ملزم کے پاسپورٹ پر درج معلومات غلط نکلیں، ملزم کا پیدائشی علاقہ لودھراں ہے لیکن جعل ساز ملزم نے جائے پیدائش سرگودھا کو ظاہر کر رکھا تھا۔
حکام کے مطابق ملزم سے مزید پوچھ گچھ کے دوران پتہ چلا کہ اس نے بہاولپور کے رہائشی اشعر نامی ایجنٹ سے ساڑھے 3 لاکھ روپے میں عمرہ ویزا اور اقامہ کی ڈیل کی تھی، ڈیل کے تحت ملزم کو سعودی عرب پہنچنے پر اقامہ دیا جانا تھا۔ ایف آئی اے حکام نے بتایا کہ ملزم کو مزید قانونی کاروائی کے لیے انسدادِ انسانی اسمگل سرکل کراچی منتقل کر دیا گیا ہے۔
