تھرو بال چیمپئن شپ یکم نومبر سے کراچی میں شروع ہو گی۔

تفصیلات کے مطابق گزشتہ روز پاکستان تھرو بال فیڈریشن کے سیکرٹری جنرل مقبول آرائیں نے بتایا کہ چیمپئن شپ کی تیاریاں ابھی سے شروع کردی گئی ہیں اور چیمپئن شپ میں تعلیمی اداروں کی بھی ٹیمیں حصہ لیں گی۔

انہوں نے کہا کہ چیمپئن شپ میں شرکت کرنے والی ٹیموں کی منیجر میٹنگ 26 اکتوبر کو منی اسپورٹس کمپلیکس ناظم آباد کراچی میں منعقد ہوگی جس میں چیمپئن شپ کے ڈراز اور قوانین کے بارے میں آگاہ کیا جائے گا۔ چیمپئن شپ 5 نومبر تک جاری رہے گی اور چیمپئن شپ کے اختتام پر کامیابی حاصل کرنے والی ٹیموں کے کھلاڑیوں میں ٹرافیاں، میڈلز اور اسناد بھی تقسیم کی جائیں گی۔

انہوں نے مزید کہا چیمپئن شپ میں اعلی کارکردگی دکھانے والے کھلاڑیوں کو قومی ٹیموں میں شامل کیا جائے گا جوکہ رواں سال دسمبر میں ترکیہ اور ملائیشیا میں کھیلی جانے والی ورلڈ تھرو بال چیمپئن شپ اور ایشین تھرو بال چیمپئن شپ میں شرکت کریں گے۔