محکمہ موسمیات کے مطابق شہرقائد میں مون سون کا دورانیہ ختم ہوگیا ہے اور شہر میں اب اس سال مون سون کی مزید بارشوں کا کوئی امکان نہیں ہے۔
محکمہ موسمیات نے بتایاہے کہ مون سون کا دورانیہ جولائی کے وسط سے ستمبر کے آخرتک برقراررہتا ہے۔ رواں سال مون سون کے تحت درمیانی اور تیزبارشیں ریکارڈ کی گئی جبکہ کچھ مقامات پر موسلادھار بارشیں ہوئی۔
چیف میٹرولوجسٹ کراچی سردار سرفراز کے مطابق کراچی سمیت دیہی سندھ کے اضلاع جبکہ بلوچستان میں بھی بارشوں کا امکان نہیں ہے، آئندہ چندروز کے دوران شہر کا موسم قدرے تیز ہواؤں کے سبب بہتر رہنے کی توقع ہے، گذشتہ دنوں مغربی ہواؤں کے سبب شہر میں حدت محسوس کی گئی۔
ان کا کہنا ہے کہ اکتوبرکا مہینہ گرم رہنے کی توقع ہے، ہرسال اکتوبر کا اوسط درجہ حرارت 35.6 ڈگری سینٹی گریڈ ہوتا ہے، نومبر کے وسط سے خنک موسم کا آغاز ہوگا جس کے بعد موسم بتدریج سرد ہوناشروع ہوگا۔ محکمہ موسمیات کے مطابق جمعے کو شہر کازیادہ سے زیادہ درجہ حرارت 35.3 ڈگری جبکہ ہوا میں نمی کا تناسب 70 فیصد ریکارڈ ہوا
