-
-
کراچی میں چند روز سے جاری ہیٹ ویو کی صورتحال ختم ہوگئی ہے تاہم 24 سے 29 اپریل کے درمیان صوبہ سندھ کے بیشتر علاقوں میں ہیٹ ویو کا امکان ہے۔
محکمہ موسمیات کے مطابق کراچی میں آئندہ 3 روز کے دوران موسم گرم جبکہ خشک کے بجائے مرطوب رہنے کا امکان ہے۔ محکمہ موسمیات کا کہنا ہے کہ شہر میں آج زیادہ سے زیادہ پارہ 36 ڈگری ریکارڈ کیا گیا ہے جبکہ آج (جمعہ) کو درجہ حرارت38 ڈگری تک تجاوز کر سکتا ہے۔
محکمہ موسمیات کے مطابق سندھ کے بیشتر علاقوں دادو، قمبر شہداد کوٹ، شہید بے نظیر آباد، جیکب آباد، کشمور، گھوٹکی، شکار پور، خیرپور، نوشہرو فیروز، لاڑکانہ، سکھر، جامشورو، مٹیاری، ٹنڈو محمد خان، ٹنڈو الہ یار، حیدرآباد اور بدین میں درجہ حرارت میں معمول سے 6 تا 8 ڈگری اضافہ متوقع ہے۔
مزید پڑھیں:کراچی میں گرمی کی شدت برقرار، ہیٹ ویو کب تک جاری رہے گی؟ محکمہ موسمیات نے پیشگوئی کردی
جبکہ تھرپارکر، عمرکوٹ اور میرپور خاص میں زیادہ سے زیادہ درجہ حرارت میں معمول سے 4 تا 6 ڈگری اضافہ ہونے کا امکان ہے۔ محکمہ موسمیات کا کہنا ہے کہ بالائی کےپی میں مطلع جزوی ابر آلود لیکن چند مقامات پر بارش کی توقع ہے، گلگت بلتستان اور کشمیر میں بھی مطلع جزوی ابر آلود اور بعض مقامات پر بارش کا امکان ہے۔
جنوبی پنجاب میں درجہ حرارت معمول سے 3 سے 5 ڈگری زیادہ رہنے کا امکان ہے جبکہ سندھ میں موسم شدید گرم، دن کا درجہ حرارت معمول سے 4 سے 6 ڈگری زیادہ رہےگا۔ محکمہ موسمیات کا مزید کہنا ہے کہ بلوچستان میں موسم گرم و خشک جبکہ تیز ہواؤں کے چلنے کی پیش گوئی کی ہے۔
