ملزم ارمغان کے لیپ ٹاپ سے بین الاقوامی فراڈ گروپ کے شواہد ملے ہیں: ایف آئی اے کی تفتیشی رپورٹ عدالت میں جمع

کراچی میں انسداد دہشت گردی کی خصوصی عدالت (اے ٹی سی) میں مصطفیٰ عامر قتل کیس کے مرکزی ملزم ارمغان کے حوالے سے وفاقی تحقیقاتی ادارے (ایف آئی اے) نے تفتیشی رپورٹ پیش کردی ہے۔

ایف آئی اے کی جانب سے انسداد دہشت گردی کی عدالت میں پیش کی گئی رپورٹ میں کہا گیا ہے کہ ارمغان کے لیپ ٹاپ سے بین الاقوامی فراڈ گروپ کے شواہد ملے ہیں، ارمغان اور اس کے والد کامران قریشی نے فراڈ کے لیے کمپنی بنائی تھی۔

مزید پڑھیں:مصطفیٰ قتل کیس، ملزم ارمغان کے کال سینٹر سے ایک اور مہنگی گاڑی کیس پراپرٹی میں شامل

ایف آئی اے کی رپورٹ میں کہا گیا ہے کہ متعلقہ کمپنی کی سالانہ آمدن 3 سے 4 لاکھ امریکی ڈالر ہے، فراڈ کے لیے بنائی گئی کمپنی میں 25 ایجنٹ کام کر رہے ہیں۔ ایف آئی اے حکام کے مطابق ارمغان نے اپنے نامعلوم ملازم افنان کے ذریعے لگژری گاڑیاں خریدیں، ان گاڑیوں کی قیمت 15 کروڑ 40 لاکھ روپے ہے۔

ایف آئی اے نے کمپنی کے دوسرے مالک کامران قریشی کو ملزم نہیں بنایا، ایف آئی اے نے نامعلوم ملزم افنان کو بھی ملزم بنایا نہ گواہ۔ ملزم ارمغان کو ایف آئی اے کل دوبارہ عدالت میں پیش کرے گی، ارمغان منی لانڈرنگ اور دیگر الزامات کے 4 مقدمات میں ریمانڈ پر ہے۔

Web Desk