-
-
کراچی میں پی ایس ایل 10 کے15، 18، 20 اور 21 اپریل کو ہونے والے میچز کے لیے سیکیورٹی کے سخت انتظامات کیے گئے ہیں اور میچ دیکھنے آنے والے شائقین کے لیے خصوصی ہدایات بھی جاری کی گئی ہیں۔
:سیکیورٹی پلان جاری
سیکیورٹی پلان کے مطابق اسپیشل سیکیورٹی یونٹ سندھ پولیس اور دیگر قانون نافذ کرنے والے اداروں کے 6700 سے زائد اہلکارتعینات ہوں گے۔ سیکیورٹی پلان میں بتایا گیا ہے کہ ایس ایس یو کے 950 کمانڈوزبشمول لیڈی کمانڈوز، سیکیورٹی ڈویژن کے 716، ٹریفک پولیس کے 1390، اسپیشل برانچ کے328 اہلکار اپنے فرائض انجام دے رہے ہیں
پلان کے مطابق اہلکاراسٹیڈیم، ایئرپورٹ، روٹس، پارکنگ پوائنٹس، ہوٹلز اور دیگر مختلف مقامات پر مامورہیں، ماہر نشانہ باز بھی حساس مقامات پر تعینات ہیں، جدید تربیت یافتہ کمانڈوز پر مشتمل پر ٹیم اسٹیڈیم کے اطراف گشت پر مامور ہوگی اور کسی بھی ہنگامی صورتحال سے نمٹنے کے لیے الرٹ رہے گی۔
ڈی آئی جی سیکیورٹی ڈاکٹر مقصوداحمد نے کہا ہے کہ سندھ پولیس اس بات کو یقینی بنانے کے لیے پرعزم ہے کہ تمام شرکاء کے لیے ایک پر امن اور خوشگوار ماحول فراہم کیا جائے، سیکیورٹی انتظامات دیگر متعلقہ اداروں کے اشتراک کے ساتھ بنایا گیا ہے۔
مزید پڑھیں:کراچی میں پی ایس ایل 10 کے میچز کا ٹریفک پلان جاری کردیا گیا
جاری کردہ پلان کے مطابق ایس ایس یو کی خصوصی کمانڈ اینڈ کنٹرول بس اسٹیڈیم کے اطراف امن و امان کی نگرانی کے لیے تعینات کی جائے گی، اسٹیڈیم کے اطراف تمام سڑکیں ٹریفک کی آمدورفت کے لیے کھلی رہیں گی، پلان میں کہا گیا ہے کہ سر شاہ سلیمان روڈ استعمال کرنے والے عوام الناس کسی بھی زحمت سے بچنے کے لیے میچ کے دوران متبادل راستہ اختیار کریں۔
شائقین کے لیے پارکنگ کا انتظام:
نیشنل بینک اسٹیڈیم میں میچ دیکھنے آنے والے شائقین کے لیے پارکنگ کا انتظام کیا گیا ہے۔ اسٹیڈیم سے متصل چائنہ گراؤنڈ اور نیشنل کوچنگ سینٹر میں گاڑیوں اور موٹر سائیکلوں کی پارکنگ کے لیے مختص ہیں جبکہ وی آئی پیز اور خصوصی پاسز کی حامل گاڑیوں کی پارکنگ اسٹیڈیم کے اندر رکھی گئی ہے۔
شائقین کیلیے خصوصی ہدایات:
جاری کردہ ہدایات کے مطابق نیشنل بینک اسٹیڈیم کے تمام گیٹ میچ کے شروع ہونے سے 3 گھنٹے پہلے کھول دیے جائیں گے، شائقین اسٹیڈیم میں داخلے کے لیے صرف مرکزی گیٹ اور گیٹ نمبر 04، 05، 12، 13 اور 14 استعمال کر سکیں گے۔ صرف وی آئی پیز اور اسٹیکر/پاسز کی حامل گاڑیاں گیٹ نمبر 8 سے داخل ہوسکیں گی۔
اسٹیڈیم کے احاطے میں سی این جی سلینڈر نصب شدہ گاڑیوں کے داخلے پر سخت پابندی ہوگی، اسٹیڈیم اور اسکے اطراف میں ہر قسم کے ڈرون کیمروں کے استعمال پر بھی پابندی ہوگی۔
مزید پڑھیں:پی سی بی نے پی ایس ایل 10 کے شیڈول کا اعلان کردیا، کراچی 5 میچوں کی میزبانی کرے گا
شائقین اپنے ہمراہ کیا کیا لے کرآئیں؟
اسٹیڈیم میں داخل ہونے کے لیے اپنا اصل قومی شناختی کارڈ لازمی ہمراہ لانا ہوگا، اسٹیڈیم میں داخل ہونے کے لیے فزیکل میچ ٹکٹ (اصل میچ ٹکٹ کی ہارڈ کاپی) کا ہونا لازمی ہوگا۔ آن لائن ٹکٹس پر اسٹیڈیم میں داخلہ ممکن نہیں ہوگا، آن لائن بک کروائے گئے ٹکٹس ٹی سی ایس کے مقرر کردہ مراکز سے فزیکل ٹکٹس حاصل کر سکتے ہیں۔
کن کن اشیاء پر پابندی ہوگی؟
تماشائیوں کو اسٹیڈیم میں مشروبات، گلاس، پلاسٹک بوتلیں، یا کوئی بھی نشہ آور اور ممنوع اشیاء لانے کی اجازت نہیں ہے، شائقین کیلیے کھانے پینے اور ریفریشمنٹ کی اشیاء اسٹیڈیم کے اندر لگے اسٹالز پر دستیاب ہوں گی۔
ممنوعہ اشیاء میں آتشی اسلحہ، کھلونا بندوق، دھماکہ خیز مواد، آتشبازی، سگریٹ شامل ہیں، اس کے علاوہ میچ باکس، لائٹر، خواتین کے ہینڈبیگ، تیز دھار اشیاء، دھاتی/لکڑی کی اشیاء اندر لانا منع ہیں۔
