-
-
وزیراعلیٰ سندھ سید مراد علی شاہ کی زیر صدارت اپیکس کمیٹی کا 32 واں اجلاس ہوا ہے۔
اجلاس میں سینئر وزیر شرجیل انعام میمن، وزیر داخلہ ضیاء الحسن لنجار، کور کمانڈر کراچی لیفٹیننٹ جنرل محمد اویس دستگیر، چیف سیکریٹری آصف حیدر شاہ، ڈائریکٹر جنرل رینجرز میجرجنرل محمد شمریز، سیکریٹری داخلہ اقبال میمن، انسپیکٹر جنرل پولیس غلام نبی میمن، پرنسپل سیکریٹری آغا واصف، ایڈیشنل آئی جی کراچی جاوید عالم اوڈھو اور دیگر متعلقہ اداروں کے افسران نے شرکت کی۔
وزیراعلیٰ سندھ سید مراد علی شاہ نے کہا کہ نیشنل ایکشن پلان کے تحت صوبوں میں اپیکس کمیٹی قائم کی گئیں، سندھ باقاعدہ اپیکس کمیٹی کا اجلاس کرتا رہا ہے، سندھ حکومت کی مؤثر پالیسی کے باعث دہشت گردی کو کنٹرول کیا گیا ہے۔
انہوں نے کہا کہ نیشنل ایکشن پلان کی روشنی میں دہشت گردی، منشیات اور دیگر سنگین جرائم کے خلاف انٹیلی جنس بیسڈ آپریشن جاری ہے، انٹیلی جنس بیسڈ آپریشن کی وجہ سے کسی شہری کو کوئی پریشانی نہیں۔ وزیراعلیٰ سندھ کا کہنا تھا گزشتہ ایپکس کمیٹی اجلاس کی روشنی میں منشیات کے عادی افراد کی بحالی کے لیئے مزید سینٹرز قائم کر رہے ہیں، اس وقت منشیات کےعادی افراد کی بحالی کیلئے کراچی میں دو سینٹرز کام کر رہے ہیں۔
اجلاس میں بریفنگ دی گئی صوبے بھر میں 31 فرینڈلی پولیس اسٹیشنز قائم کئے جا رہے ہیں، دس پولیس تھانوں کو اپگریڈ کیا گیا ہے اور باقی پر کام جاری ہے، اسلحہ کی نمائش پر سیکشن 144 لگایا گیا ہے، گاڑیوں پر پولیس لائٹس، رنگین شیشے، فینسی نمبر پلیٹس اور اسلحہ کی نمائش کے خلاف صوبہ بھر میں 1474 ایف آئی آرز درج ہوئی ہیں۔
جس پر 34.6 ملین روپے جرمانہ وصول کیا گیا ہے، ڈاکوؤں کے خلاف سندھ، پنجاب اور بلوچستان کے مشترکہ آپریشن کرنے کے لئیے تینوں صوبوں کی پولیس رابطہ میں ہیں۔ اجلاس میں عزم کیا گیا صوبے کو دہشت گردی، منشیات اور دیگر جرائم سے پاک کرنے کیلئے اقدامات کو مزید بہتر کیا جائے گا۔
وزیراعلیٰ سنددھ نے نجی گاڑیوں پر سول ڈریس میں گارڈز کے خلاف کارروائی تیز کرنے کی ہدایت جاری کی۔ مراد علی شاہ نے کہا کہ سندھ پولیس اور رینجرز کچے میں مشترکہ آپریشن کر رہی ہیں۔
اجلاس کو آگاہ کیا گیا کہ سندھ اور پنجاب میں ڈاکوؤں کے ایک ہی گینگز ہین جو دونوں طرف جرائم کرتے ہیں۔ ، وزیراعلیٰ سندھ نے فیصلہ کہا تینوں صوبوں کی رابطہ کاری سے مشترکہ آپریشن پلان کیا جائے، انہوں نے کہا حب پر مشترکہ چیک پوسٹ قائم کرنے کے لیئے 214 ملین روپے مختص کئے ہیں، چیک پوسٹ سے سندھ، بلوچستان بارڈر پر اسمنگلنگ اور دیگر جرائم کی روک تھام کی جائےگی۔
وزیراعلیٰ سندھ کے مطابق سندھ حکومت نے فیوژن سینٹر ڈی جی نارکوٹکس آفس میں قائم کئے ہیں، فیوژن سینٹر کے تحت ایجنسیوں کے درمیان بہتر کوآرڈینیشن سے نارکوٹکس کرائم کی کھوج مزید مؤثر ہوگی۔
اجلاس کو بریفنگ دی گئی کہ اس سال 2025ء میں انسداد دہشت گردی کے 23 مقدمات درج ہوئے، 23 مقدمات میں سے 7 چالان کئے، 4 کو سزائیں ہوئیں اور باقی ماندہ زیر سماعت ہیں۔ بریفنگ میں بتایا گیا سال 2025ء میں دہشت گردوں کے خلاف 318 انٹیلی جنس بیسڈ آپریشن کیے، آپریشن میں 153 مقدمات درج کر کے 84 مجرم گرفتار کیے اور 12 مارے گئے سال 2024ء میں 231 آپریشن کیے۔
ایپکس کمیٹی اجلاس میں بریفنگ میں بتایا گیا سندھ پولیس نے چائنیز کی سکیورٹی کے لیے خصوصی یونٹ قائم کیا ہے، سی پیک اور نان سی پیک میں کام کرنے والے چائنیز کو سکیورٹی فراہم کی جارہی ہے، پولیس کے کاؤنٹر ٹیررازم ڈیپارٹمنٹ (سی ٹی ڈی) کو مزید مضبوط کیا جا رہا ہے۔ وزیراعلیٰ مراد علی شاہ نے کہا سندھ حکومت نے 3.6 بلین روپے سی ٹی ڈی کو مضبوط کرنے کے لیئے مختص کئے ہیں، مختلف فنڈز سے جدید آلات، سافٹ ویئرز، فرانزک ٹولز بھی خریدے جائینگے۔
