-
-
کراچی کے علاقے نارتھ کراچی میں پاور ہاؤس چورنگی کے قریب ڈمپر کی ٹکر سے موٹرسائیکل سوار شخص زخمی ہوگیا جس کے بعد مشتعل افراد نے کئی ڈمپر کو آگ لگادی۔ میڈیا رپورٹ کے مطابق نارتھ کراچی پاور ہاؤس چورنگی حادثے کے ایک عینی شاہد نے بتایا کہ ڈمپر ڈرائیور 17،18 سال کا لڑکا تھا۔جو ریس لگاتا ہوا آ رہا تھا۔
عینی شاہد نے بتایا کہ ریس لگانے والے ڈمپر ڈرائیور کو لوگوں نے روکا اور مارا، ڈرائیور نے فرار کی کوشش میں ڈمپر موٹرسائیکلوں پر چڑھا دیا جس سے دو موٹر سائیکل تباہ ہو گئیں مگر کوئی جانی نقصان ہیں ہوا۔ البتہ ایک موٹر سائیکل سوار شخص زخمی ہوا۔ مشتعل افراد نے 9 گاڑیوں کو آگ لگا دی
رہنما ڈمپر ایسوسی ایشن کی گفتگو:
ڈمپر ایسوسی ایشن کے رہنما لیاقت محسود نے پاور ہاؤس چورنگی پر میڈیا سے گفتگو میں دعویٰ کیا کہ میری 11 گاڑیوں کو جلایا گیا۔ انہوں نے کہا کہ حادثے میں کوئی زخمی ہوا ہے تو کہاں ہے، سامنے لایا جائے ، ڈمپروں کو جلانے والے افراد کو گرفتار کیا جائے، حکومت تحفظ فراہم کرے۔
ڈمپروں کو آگ لگانے کیخلاف ڈرائیوروں کا احتجاج:
دوسری جانب پاور ہاؤس چورنگی پر ڈمپروں کو آگ لگانے کے خلاف سپر ہائی وے پر احتجاج کیاگیا، ڈمپر ڈرائیوروں نے لدھا کچرا سہراب گوٹھ آلاصف اسکوائر کے قریب سڑک پر گرا دیا۔ سہراب گوٹھ کے قریب متعدد ڈمپروں سے کچرا گرایا گیا جس کی وجہ سے ٹریفک کی روانی معطل ہوئی۔
پولیس کا کریک ڈاؤن:
کراچی میں ڈمپروں کو آگ لگانے میں ملوث ملزمان کی گرفتاری کے لیے رات گئے کریک ڈاؤن کیا گیا جس میں پولیس نے متعدد افراد کو گرفتار کرلیا ہے۔ ترجمان ایس ایس پی سینٹرل کے مطابق ملزمان کی شناخت سی سی ٹی وی اور ویڈیوز سے کی جارہی ہے۔
ایس ایس پی سینٹرل کا کہنا ہے کہ پاور ہاؤس کی جانب کی سڑکیں کھلی ہیں اور ٹریفک رواں دواں ہے، پولیس کی بھاری نفری موجود ہے، امن وامان کو سبوتاژ کرنے کی کوشش کرنے والے عناصر کو نہیں چھوڑا جائے گا۔
مزید پڑھیں: کورنگی کراسنگ پر ڈمپر کی موٹر سائیکل کو ٹکر، 3 افراد جاں بحق، ڈمپر نذر آتش
ایس ایس پی ڈسٹرکٹ سینٹرل ذیشان شفیق صدیقی کا کہنا ہے کہ واقعے کے بعد سخت اقدامات اٹھائے گئے ہیں اور اب حالات کنٹرول میں ہیں۔ پولیس نے ڈمپر آتشزدگی کے پانچ مقدمات اینٹی ٹیرررزم ایکٹ کے تحت درج کئے ہیں۔ مقدمات سرسید، بلال کالونی ،نیو کراچی اور خواجہ اجمیر نگری تھانے میں درج کیے گئے ہیں۔ جلاؤ گھیراؤ میں ملوث افراد کے خلاف سی سی ٹی وی فوٹیج، موبائل فون ویڈیو اور دیگر ذرائع سے نشاندہی کے بعد 19 ملزمان گرفتار کئے جاچکے ہیں۔ مزید گرفتاریوں کے لئے چھاہے مارے جارہے ہیں۔
یاد رہے اس سے قبل کراچی میں گزشتہ روز بھی ٹریلر کی ٹکر سے موٹر سائیکل سوار جاں بحق ہوگیا۔ پولیس کے مطابق یہ حادثہ کورنگی میں ویٹا چورنگی پر پیش آیا جہاں ٹریلر کی ٹکر سے موٹرسائیکل سوار جان سے ہاتھ دھو بیٹھا۔
پولیس کا کہنا ہےکہ کراچی میں 100 روز میں ہیوی گاڑیوں کی ٹکر سے جاں بحق افراد کی تعداد 80 ہوگئی ہے۔ اس کے علاوہ کراچی میں رواں سال اب تک ٹریفک حادثات میں جاں بحق افرادکی تعداد 256 ہوچکی ہے۔
