-
-
امریکی صدر ڈونلڈ ٹرمپ نے پاکستان سمیت کئی ممالک پر تجارتی محصولات میں اضافہ کر دیا ہے، جس میں پاکستانی مصنوعات پر 29 فیصد ٹیرف بھی شامل ہے۔ یہ فیصلہ پاکستان کی معیشت اور برآمدات نفی اثرات کا سبب بن سکتا ہے ۔
ٹیرف کیا ہے؟
سادہ الفاظ میں، ٹیرف ایک قسم کا ٹیکس ہوتا ہے جو کسی ملک کی حکومت درآمد شدہ مصنوعات پر عائد کرتی ہے۔ اس کا بنیادی مقصد ملکی صنعتوں کو تحفظ فراہم کرنا اور درآمدات کو کم کرنا ہوتا ہے۔
فرض کریں کہ ایک پاکستانی کمپنی امریکہ کو 100 روپے مالیت کی مصنوعات برآمد کرتی ہے۔ 29% ٹیرف کے بعد، اس کی قیمت امریکی خریدار کے لیے بڑھ کر 129 روپے ہو جائے گی۔ اس اضافی لاگت کے باعث امریکی مارکیٹ میں پاکستانی مصنوعات کی مانگ میں کمی آسکتی ہے۔
پاکستانی معیشت پر اثرات
معاشی ماہرین کے مطابق، امریکہ پاکستان کی کل برآمدات کا تقریباً 20 فیصد خریدارہے، نئے ٹیرف سے پاکستانی ٹیکسٹائل انڈسٹری سب سے زیادہ متاثر ہو سکتی ہے کیونکہ یہ اپنی برآمدات کے لیے امریکی مارکیٹ پر بہت زیادہ انحصار کرتی ہے۔تاہم، غیر ٹیکسٹائل برآمد کنندگان کے لیے صورتحال مزید سنگین ہو سکتی ہے،
چونکہ امریکی مارکیٹ میں پاکستانی مصنوعات مہنگی ہو جائیں گی، اس کے نتیجے میں فیکٹریوں کی پیداوار متاثر ہو سکتی ہے، جس سے ملازمتوں کے خاتمے کا خدشہ پیدا ہو جائے گا۔ خاص طور پر ٹیکسٹائل انڈسٹری میں کام کرنے والے مزدور اس سے براہ راست متاثر ہو سکتے ہیں۔
پاکستان کے لیے ممکنہ حکمت عملی
پاکستان کو اس بحران سے نکلنے کے لیے اپنی برآمدی حکمت عملی میں تبدیلیاں لانی ہوں گی۔ ماہرین کچھ اہم اقدامات تجویز کرتے ہیں جیسے،
- نئی برآمدی منڈیوں کی تلاش : پاکستان کو یورپی یونین اور دیگر مارکیٹس میں اپنی برآمدات کو بڑھانے پر توجہ دینی چاہیے، جہاں نئے مواقع پیدا ہو سکتے ہیں۔
- مذاکرات: امریکہ کے ٹیرف چیلنج کا سامنا کرنے والے دیگر ممالک کے ساتھ مل کر پاکستان کو سفارتی اور تجارتی مذاکرات کرنے چاہئیں تاکہ عالمی سطح پر ٹیرف میں کمی کی جا سکے۔
- مقامی صنعتی پیداوار کی بہتری: پاکستانی صنعتوں کو مزید خود کفیل اور عالمی معیار کے مطابق بنانے کے لیے نئی پالیسیوں کی ضرورت ہوگی تاکہ وہ دیگر منڈیوں میں بھی اپنی جگہ بنا سکیں۔
پاکستان کے لیے امریکی ٹیرف ایک بڑا چیلنج ضرور ہے، لیکن یہ ناقابلِ حل نہیں۔ اگر پاکستان درست حکمت عملی اختیار کرے، تو وہ اس بحران کو ایک موقع میں تبدیل کر سکتا ہے۔ اگر پاکستان اپنی برآمدات کو مزید مضبوط بنا لے تو وہ امریکہ پر انحصار کرنے کے بجائے عالمی تجارتی نظام میں بہتر مقام حاصل کر سکتا ہے۔
