-
-
میانمار میں زلزلے سے ہلاکتوں کی تعداد میں مسلسل اضافہ ہورہا ہے۔ غیر ملکی میڈیا کے مطابق گزشتہ روز آنے والے 7.7 شدت کے زلزلے کے جھٹکوں کے باعث تباہ ہونے والی عمارات، مکانوں اور دیگر کے ملبے تلے دب کر ہلاک ہونے والے افراد کی تعداد 700 ہو گئی ہے جبکہ زخمیوں کی تعداد 1670 تک پہنچ گئی ہے۔
میانمار کے شہر منڈالے میں سب سے زیادہ 694 افراد ہلاک ہوئے، یہاں کئی عمارتوں اور پلوں کو بھی نقصان پہنچا۔ میانمار میں 7.7 شدت کے زلزلے کے جھٹکے کے اثرات تھائی لینڈ کے دارالحکومت بنکاک میں بھی محسوس کیے گئے تھے جہاں حکام کا کہنا ہے کہ زلزلے سے فلک بوس عمارتیں چند لمحوں میں ملبے کا ڈھیر بن گئی تھیں، جس کے نتیجے میں چھ افراد جان سے گئے، 22 زخمی ہوگئے جبکہ 101 لاپتہ ہیں۔
دوسری جانب میانمار اور تھائی لینڈ میں زلزلے کے بعد پاکستانی شہریوں کی مدد کے لیے سفارتخانے الرٹ ہوگئے۔ پاکستانی سفارتخانے یانگون اور بینکاک میں ہنگامی صورتحال میں معاونت فراہم کریں گے جبکہ وزارت خارجہ میں کرائسز منیجمنٹ یونٹ فعال کردیا گیا ہے۔ علاوہ ازیں پاکستانی شہریوں کی ہنگامی مدد کے لیے وزارت خارجہ نے نمبرز بھی جاری کردیے ہیں۔
