-
-
میئر کراچی بیرسٹر مرتضیٰ وہاب نے ایمپریس مارکیٹ کا دورہ کیا ہے۔ میئر کراچی نے کہا ہے کہ صدر میں سڑک کے کنارے پارکنگ کی وجہ سے ٹریفک کے ہجوم کو کم کرنے کے لیے کے ایم سی کی جانب سے ایمپریس مارکیٹ کے پچھلے حصے میں تقریباً 500 کاروں کی پارکنگ کی جگہ تیار کی جا رہی ہے۔
مرتضیٰ وہاب نے بتایا کہ 500 گاڑیوں کی پارکنگ عید کی تعطیلات کے بعد فعال کی جائے گی۔ ترجمان کے مطابق ایمپریس مارکیٹ کے اندرونی حصوں کی بہتری پر بھی کام جاری ہے۔ پہلے مرحلے میں، گوشت کے حصے کو بہتر بنایا جا رہا ہے اور امید ہے کہ ایک مہینوں میں تیار ہو جائے گا تاکہ لوگوں کو صاف اور صحت بخش گوشت ملے۔
واضح رہے کہ کچھ ہفتے قبل میئر کراچی مرتضی وہاب نے اعلان کیا تھا کہ وہ شہر کے گنجان آباد علاقے صدر اور ریڈ زون کے اندر کچھ ایسے نامزد پارکنگ ایریاز بنائیں گے جہاں شہری اپنی گاڑیاں پارک کر سکیں گے۔
