بلوچستان میں بولان کے مقام پر جعفرایکسپریس پر دہشت گردوں کے حملے کے بعد ہمسایہ ملک اور ملک دشمن عناصر سوشل میڈیا پر متحرک ہوگئے
سیکیورٹی ذرائع کے مطابق جعفرایکسپریس پر جہاں ایک جانب دہشت گردوں نے بزدلانہ حملے کیا وہیں سوشل میڈیا پر مختلف ملک دشمن اکاؤنٹس کی جانب سے گمراہ کن پروپیگنڈا کیا جارہا ہے اور اس پروپیگنڈا کے ذریعے ہمسایہ ملک اور ملک دشمن عناصر پاکستان کو بدنام کرنے کی کوششوں میں مصروف ہیں۔
سیکیورٹی ذرائع کے مطابق سوشل میڈیا پر آرٹیفشل انٹیلیجنس سے تیار کردہ ویڈیوز، فیک واٹس ایپ پیغامات اور پوسٹرز کے ذریعے گمراہ کن معلومات پھیلائی جارہی ہے۔ وہیں پرانی ویڈیوز اور پرانی تصاویر بھی سوشل میڈیا پر پھیلا کر انہیں جعفر ایکسپریس پر حملے سے منسلک کرنے کی کوشش کی جارہی ہے۔
سیکیورٹی ذرائع کے مطابق دہشت گردوں سے جڑے سوشل میڈیا اکاؤنٹس بھی پاکستان مخالف زہر اگلنے میں ہمسایہ ملک کے ساتھ ہیں۔ ہمسایہ ملک شدت پسند رہنماؤں کے تجزیے دکھا کر لوگوں کو گمراہ کرنے میں مصروف ہیں۔
عوام سوشل میڈیا پر پھیلائے جانے والے گمراہ کن اور من گھڑت پروپیگنڈا کی بجائے مستند ذرائع سے دی جانے والی معلومات پر اکتفا کریں۔
