نیشنل ڈیٹا بیس اینڈ رجسٹریشن اتھارٹی (نادرا) نے اپنی 25ویں سالگرہ پر پاکستان میں پہلی بار "ڈی میٹریلائزڈ آئی ڈی کارڈ” متعارف کرانے کا اعلان کر دیا ہے۔
تفصیلات کے مطابق پیر کو نادرا ہیڈ کوارٹر میں پروقار تقریب کا انعقاد کیا گیا، جس میں نادرا کے بانی چیئرمین میجر جنرل (ر) زاہد احسان مہمان خصوصی تھے ۔ چیئرمین نادرا لیفٹیننٹ جنرل (ر) افسر منیر ،سپیشل سیکریٹری داخلہ، چیف سٹیٹسٹیشن (ادارہ شماریات)، ڈائریکٹر جنرل امیگریشن اینڈ پاسپورٹ، نادرا کے سابق چیئرمینز، نادرا بورڈ کے سابق ممبران اور نادرا کے سینئر افسران نے شرکت کی۔
تقریب میں اسٹیٹ بینک کا یادگاری سکہ، پاکستان پوسٹ کا خصوصی ڈاک ٹکٹ، 25 سالہ سفر پر مبنی کتاب کی رونمائی کی گئی، نادرا کے 25 سالہ کامیاب سفر پر صدر مملکت ،وزیراعظم اور وزیر داخلہ نے خصوصی پیغامات جاری کیے ۔
صدر مملکت نے کہا کہ شہریوں کو قانونی اور محفوظ شناخت کی فراہمی کیلئے نادرا کی خدمات لائق تحسین ہیں، نادرا، ریاست اور عوام کے درمیان اعتماد کے رشتے کو مضبوط بنا رہا ہے۔ آصف زرداری کا کہنا تھا کہ نادرا جدید ٹیکنالوجی کے استعمال کو مزید وسعت دیکر اپنی کارکردگی میں بہتری لائے۔
وزیراعظم شہباز شریف کا اپنے پیغام میں کہنا تھا کہ ٹیکنالوجی کے میدان میں نادرا کی مہارت ملکی معیشت کی ترقی میں بنیادی کردار ادا کرے گی۔ وزیر داخلہ محسن نقوی کا اس موقع پر کہنا تھا کہ ڈی میٹریلائزڈ کارڈ، ڈیجیٹل شناخت کی جانب اہم قدم ہے، ڈیجیٹل تصدیقی نظام جلد متعارف کرایا جائے گا، ڈی میٹریلائزڈ کارڈ کی تصدیق کا مربوط نظام بھی وضع کیا جارہا ہے۔
