-
-
سندھ کے وزیر اطلاعات شرجیل انعام میمن نے کہا ہے کہ سندھ حکومت نے رمضان المبارک کے دوران عوام کو مہنگائی سے ریلیف دینے کے لیے صوبے بھر میں بچت بازار قائم کر دیے ہیں۔ ان بازاروں کا مقصد عوام تک ضروری اشیاء سستے داموں پہنچانا اور خاص طور پر متوسط اور کم آمدنی والے طبقے کو سہولت فراہم کرنا ہے۔
انہوں نے کہا کہ حکومت سندھ کی اولین ترجیح عوام کو مہنگائی سے بچانا ہے، اور اس مقصد کے لیے بچت بازاروں میں شفافیت اور انتظامی نگرانی کو یقینی بنایا گیا ہے، انہوں نے کہا کہ ناجائز منافع خوری اور بدانتظامی کسی صورت برداشت نہیں کی جائے گی، اور خلاف ورزی کرنے والوں کے خلاف سخت کارروائی ہوگی۔
شرجیل انعام میمن کے مطابق، ذخیرہ اندوزی اور قیمتوں میں غیر ضروری اضافے کو روکنے کے لیے افسران کو خصوصی ڈیوٹیز سونپی گئی ہیں۔ حکومت سندھ عوام کو بنیادی ضروری اشیاء مناسب قیمتوں پر فراہم کرنے کے لیے عملی اقدامات کر رہی ہے، اور بچت بازاروں میں قیمتوں اور اشیاء کے معیار کی مسلسل نگرانی کی جا رہی ہے۔
انہوں نے مزید کہا کہ عوام سے اپیل ہے کہ وہ بچت بازاروں سے بھرپور فائدہ اٹھائیں اور کسی بھی شکایت کی صورت میں متعلقہ افسران سے براہ راست رابطہ کریں۔
