میلویئر وائرس کے ذریعے کرپٹو کرنسی والٹ ڈیٹا چرانے کے لیے ہیکرز سرگرم ہو گئے ہیں، اس حوالے سے پاکستان سائبر ایمرجنسی رسپانس ٹیم نے ایڈوائزری جاری کی ہے۔
ایڈوائزری میں کہا گیا ہے کہ پی ڈی ایف فائلوں کی آڑ لے کر میلویئر وائرس پھیلایا جاتا ہے، جعلی بوٹ ڈیٹیکشن سسٹم کی تصاویر کا استعمال کر کے وائرس پھیلایا جاتا ہے اور وائرس سے چوری شدہ معلومات اور ڈیٹا کو ہیکنگ فورمز پر بیچا جا سکتا ہے۔
ایڈوائزری کے مطابق بوٹ ڈیٹیکشن سسٹم سے وسیع پیمانے پر فشنگ مہم کی نشاندہی کی گئی ہے، تصاویر پر کلک کرنے سے صارفین فشنگ ویب سائٹس پر منتقل ہو جاتے ہیں۔ ایڈوائزری میں کہا گیا ہے کہ نقصان دہ پی ڈی ایف پہچاننےکی تربیت دی جائے اور جعلی ویب سائٹس کی نگرانی، دھوکہ دہی پر مبنی ڈومینز کو رپورٹ کیا جائے۔
سائبرایمرجنسی رسپانس ٹیم کی ایڈوائزری میں حملوں کی روک تھام کے لیے تمام سسٹمز کو اپ ڈیٹ رکھنے کی سفارش کی گئی ہے اور کہا گیا ہے کہ ملٹی فیکٹر تصدیق کا نظام اپنایا جائے اور سائبر سکیورٹی دفاع کو مضبوط بنایا جائے۔
