-
-
آئی سی سی چیمپینز ٹرافی ،نیشنل اسٹیڈیم کے پریس کانفرنس ایریا میں فوٹو وال سجادی گئی۔ فوٹو وال پر کراچی کے کرکٹرز اور اسٹیڈیم سے جڑے اہم واقعات کی تصاویر نمایاں کی گئی ہیں، قومی ٹیم کے سابق کپتان سرفراز احمد کو نیشنل اسٹیڈیم کی وال پر نمایاں اہمیت حاصل ہوئی ہے۔
نیشنل اسٹیڈیم میں بنائی گئی وال پر کراچی کے کھلاڑیوں کے پورٹریٹ اور اہم لمحات کی تصاویر ہیں، پاکستان کی انڈر-19 ورلڈکپ فتوحات، چیمپئنز ٹرافی کامیابی کی تصاویر آویزاں کی گئی ہیں۔ نیشنل اسٹیڈیم پر پہلی سنچری بنانے والے خالد عباداللّٰہ کی تصویر بھی آویزاں کی گئی ہے۔ خاتون کرکٹر کرن بلوچ اور ویمن ٹیم کی ایشیئن گیمز میں فتح کی تصویر بھی نمایاں طور پر آویزاں کی گئی ہے۔
نیشنل اسٹیڈیم میں یونس خان کی ٹرپل سنچری بھی وال کی زینت بنی ہے،2004میں خالد لطیف کی قیادت میں انڈر-19 ورلڈکپ کی کامیابی کی تصاویر بھی وال کا حصہ بنائی گئی ہیں۔ سرفراز احمد کی قیادت میں چیمپئنز ٹرافی 2017، انڈر-19 ورلڈکپ 2006 بھی وال کی زینت بنائی گئی ہیں۔
کامران اکمل اور عبدالرزاق کی بھارت کے خلاف وننگ پارٹنر شپ کو بھی اُجاگر کیا گیا۔ محمد رضوان، بابر اعظم کی تصاویر بھی وال پر لگادی گئیں،
بنگلور میں بھارت کے خلاف پاکستان کی یادگار کامیابی بھی وال کا حصہ بنائی گئی ہے۔ محمد سمیع کا بھارت کے خلاف شاندار اسپیل، راشد لطیف کی تصاویر بھی وال کی زینت بنی ہوئی ہیں۔
ٹیسٹ کپتان شان مسعود، سلیم ملک، اقبال قاسم اور معین خان بھی وال کی زینت بنے ہیں۔ سابق کپتان انضمام الحق کی بنگلادیش کے خلاف سنچری بھی وال میں شامل ہے۔
کراچی کے معروف کرکٹرز کے پورٹریٹ، محمد برادران کی تصاویر آویزاں کی گئی ہیں۔ شعیب محمد، توصیف احمد، آصف اقبال کو خصوصی جگہ دی گئی ہے۔ جاوید میانداد، وقاریونس، وسیم اکرم، عمران خان بھی وال کی زینت بنے ہیں۔
