-
-
اسلام آباد ہائی کورٹ نے فیڈرل پبلک سروس کمیشن (ایف پی ایس سی) کو سی ایس ایس 2024 کے نتائج جاری کرنے سے پہلے نئے امتحانات سے روکنے کے لیے دائر کی گئی درخواست مسترد کردی ہے۔
اسلام آباد ہائی کورٹ کے جسٹس محسن اختر کیانی نے ایف پی ایس سی کو سی ایس ایس کے نئے امتحانات سے روکنے کے لیے دائر کی گئی درخواست پر محفوظ فیصلہ جاری کر دیا، تفصیلی فیصلہ بعد میں جاری کیا جائے گا۔
اس سے قبل سی ایس ایس نتائج روکنے کے خلاف درخواستوں کی سماعت میں جسٹس محسن اختر کیانی نے ریمارکس دیے تھے کہ عدلیہ، پارلیمنٹ اور انتظامیہ سمیت تمام ستون گر چکے ہیں، عدلیہ کا ستون ہوا میں ہے مگر ہم پھر بھی مایوس نہیں ہیں۔
انہوں نے چیئرمین ایف پی ایس سی لیفٹیننٹ جنرل (ر) اختر نواز دستی سے کہا کہ 2024ء کے امتحان کے نتائج آئے نہیں اور آپ 2025 کا امتحان لینے جارہے ہیں، اگر آج بھی کہہ دیں کہ نتائج کا اعلان کر رہے ہیں تو ہم درخواستیں نمٹا دیتے ہیں۔ اس پر چیئرمین ایف پی ایس سی نے کہا کہ ان کےلیے فوری نتائج کا اعلان کرنا ممکن نہیں ہے۔
