متحدہ عرب امارات کی جنرل سول ایوی ایشن اتھارٹی (جی سی اے اے) نے کہا ہے کہ ملک نے 2024 میں نیا سنگ میل عبورکرتے ہوئے ایک ملین ایئرموومنٹ ( پروازوں)کا ہدف عبورکیا ہے۔ میڈیا رپورٹس کے مطابق یواے ای سول ایوی ایشن اتھارٹی کا کہنا ہے کہ 22 دسمبر کو ایمریٹس کی شنگھائی کے لیے پرواز 305 نے ایک ملین ایئر موومنٹ کا ہدف عبور کیا جو ایوی ایشن کے سفر میں بڑی کامیابی ہے۔
یواے ای کے وزیر برائے اقتصادیات اور جنرل سول ایوی ایشن اتھارٹی کے بورڈ آف ڈائریکٹرز کے چیئرمین عبداللہ بن طوق المری کا کہنا تھا کہ ایک سال میں 10 لاکھ سے زیادہ پروازوں کا ہدف حاصل کرنا صرف عددی کامیابی نہیں بلکہ ایوی ایشن کے شعبے کو قومی معیشت کے اہم ستون کے طور پر ترقی دینے اور بین الاقوامی ایئرموومنٹ کی منزل کے طور پر اپنی پوزیشن مستحکم کرنے کے حوالے سے امارات کے عزم کو ظاہر کرتا ہے۔
انہوں نے کہا کہ گزشتہ 2 سالوں میں ملکی ایئر ٹریفک میں 20 فیصد سے زیادہ اضافہ ہوا جو عالمی سطح پر سب سے زیادہ ہے۔ اتھارٹی کے ڈائریکٹر جنرل سیف محمد السویدی نے کہا کہ ایک سال میں 10 لاکھ سے زیادہ پروازیں شیخ زاید ایئر نیوی گیشن سینٹر کی ٹیم کی سخت محنت اور عزم کے ساتھ ایوی ایشن سیکٹر میں ہمارے شراکت داروں کے ساتھ منصوبہ بندی اور قریبی تعاون کو ظاہر کرتی ہیں.
انہوں نے کہا کہ 2023 کے مقابلے میں2024 میں فضائی ٹریفک میں 10.3 فیصد اضافہ ریکارڈ کیا گیا جس میں سیفٹی، کارکردگی کے اعلیٰ معیار کو برقرار رکھنے اور خدمات کی ترقی کو جاری رکھنے پر زور دیا گیا۔
