ایف آئی اے نے کراچی میں کارروائی کرتے ہوئے جعل سازی سے پاکستانی شناختی کارڈ حاصل کرنے والی 3 مفرورخواتین ملزمان کو گرفتار کر لیا ہے۔ تفصیلات کے مطابق ایف آئی اے اینٹی ہیومن ٹریفکنگ سرکل(ایف آئی اے) کی کراچی کے علاقے گلشن اقبال میں کی گئی ایک کارروائی میں تین مفرور خواتین پکڑی گئی ہیں، جن پر پاکستانی شناختی کارڈ جعل سازی سے حاصل کرنے کا الزام ہے۔
ایف آئی اے کے مطابق گرفتار خواتین عائشہ ناز، حنا ناز، افشاں ناز کا تعلق بنگلادیش سے بتایا گیا ہے، جو ایف آئی اے کو 2022 سے مطلوب تھیں، ان خواتین ملزمان نے غیر ملکی ہونے کے باوجود قومی شناختی کارڈ حاصل کیے، ابتدائی تفتیش کے مطابق خواتین نے جعل سازی سے قومی شناختی کارڈز حاصل کیے ہیں۔
ایف آئی اے نے کہا ہے کہ خواتین ملزمان نے ایجنٹ کی مدد سے جعلی دستاویزات کی بنیاد پر برتھ اور ڈیتھ سرٹیفیکیٹ حاصل کیے تھے، ملزمان کو سیکریٹری یونین کونسل، رضویہ سوسائٹی، لیاقت آباد ٹاؤن نے برتھ ڈے اور ڈیتھ سرٹیفیکیٹ جاری کیے، پھر ان جعلی دستاویزات کی مدد سے قومی شناختی کارڈ حاصل کر لیے۔
ایف آئی اے کے مطابق ملزمان کی سہولت کاری میں ملوث عناصر کے خلاف بھی تحقیقات کو وسیع کر دیا گیا ہے، اور خواتین سے تفتیش کے دوران نادرا اہلکاروں کے ملوث ہونے کا تعین بھی کیا جائے گا، اور ملزمان کی نشان دہی پر مزید گرفتاریاں بھی متوقع ہیں۔
