کراچی کے میٹرک اور انٹر کے امتحانات برائے 2025 میں ای مارکنگ کا تجربہ کرنے کا فیصلہ کیا گیا ہے۔ تفصیلات کے مطابق کراچی کے دونوں تعلیمی بورڈز، ثانوی تعلیمی بورڈ اور اعلیٰ ثانوی تعلیمی بورڈ نے رواں سیشن کے سالانہ امتحانات 2025 کے امتحانی پرچے اور ان کی اسسمنٹ(جانچ)ای مارکنگ کے تحت کرنے کا حتمی فیصلہ کرلیا ہے، میٹرک اور انٹرمیڈیٹ کی سطح پر ای مارکنگ کی تیاریاں بھی شروع کردی گئی ہیں۔
یہ فیصلہ فیڈرل بورڈ اسلام آباد میں گزشتہ ہفتے ای مارکنگ کی منعقدہ ایک ٹریننگ ورکشاپ کے بعد سامنے آیا ہے جس میں میٹرک بورڈ کراچی اور انٹرمیڈیٹ بورڈ کراچی کے ناظمین امتحانات ظہیر الدین بھٹو اور زرینہ چوہدری شریک ہوئی تھیں۔
واضح رہے کہ فیصلے کے تحت میٹرک اور انٹر بورڈ آزمائشی طور پر سالانہ امتحانات 2025 میں نویں اور گیارہویں جماعتوں میں ای مارکنگ کا تجربہ کریں گے، میٹرک بورڈ نویں جماعت سائنس فیکلٹی کے حیاتیات (biology) اور کمپیوٹر سائنس کے پرچوں جبکہ انٹر بورڈ سائنس جنرل فیکلٹی کے ریاضی کے پرچے میں ای مارکنگ کرے گا۔
