شام میں پھنسے 318 پاکستانی بیروت سے چارٹر طیارے کے ذریعے بحفاظت اسلام آباد پہنچ گئے ہیں۔ وفاقی وزیر برائے منصوبہ بندی احسن اقبال نے اسلام آباد ایئرپورٹ پر بیروت سے آنے والے پاکستانیوں کا استقبال کیا۔
اس موقع پر وفاقی وزیر احسن اقبال نے میڈیا سے گفتگو کرتے ہوئے کہا کہ شام سے بحفاظت پاکستان پہنچنے پر اللہ تعالیٰ کا شکر ادا کرتے ہیں، شام میں مقیم پاکستانیوں کی واپسی پہلی ترجیح ہے۔ انہوں نے کہا کہ دنیا میں جہاں بھی پاکستانی مشکل میں ہو گا تو وہ تنہا نہیں ہو گا۔
وفاقی وزیر نے کہا شام کی صورتحال کی وجہ سے پاکستانی وہاں محصور ہو گئے تھے، وزیر اعظم نے پاکستانیوں کو فوراً واپس لانے کی ہدایت کیں۔ احسن اقبال نے لبنان کے وزیر اعظم کا بھی شکریہ ادا کیا جنہوں نے پاکستانیوں کو ویزے جاری کرنے میں اہم کردار ادا کیا۔
رپورٹ کے مطابق وزیراعظم شہباز شریف نے لبنانی وزیراعظم سے رابطہ کرکے شام میں پھنسے پاکستانیوں کے انخلا میں مدد کی اپیل کی تھی جس پر لبنان نے پاکستانی شہریوں کو ویزے جاری کیے ۔ ان شہریوں کو بذریعہ سڑک شام سے لبنان پہنچایا گيا، جہاں سے آج انہيں خصوصی طیارے کے ذریعے پاکستان روانہ کیا گیا تھا۔ بیروت ائیر پورٹ پر پاکستان کے سفیر نے پاکستانی شہریوں کو رخصت کیا۔
