پاکستان کی تاریخ میں پہلی بار ہندو پولیس سروس پاکستان (پی ایس پی) آفسیر کی تعیناتی کی گئی ہے ہندو پی ایس پی افسر راجیندر مہیگوار نے فیصل آباد میں تعیناتی کے بعد اپنے فرائض سرانجام دینا شروع کردیے ہیں۔
پی ایس پی افسر راجیندر مہیگوار کو ایس پی تعینات کیا گیا ہے راجیندر مہیگوار کا کہنا ہے کہ عوام کی خدمت کا خواب حقیقت میں ڈھلنے پر انتہائی خوش ہوں، پولیس ڈیپارٹمنٹ میں رہ کر ہم لوگوں کے وہ مسئلے حل کر سکتے ہیں جو باقی محکموں میں رہ کر نہیں کر سکتے، مجھے نہیں لگتا کہ باقی محکموں میں رہتے ہوئے ہم کمیونٹی کے لوگوں کے لیے اتنا آن گراؤنڈ کام کرسکتے ہیں۔
دوسری جانب پنجاب پولیس کے قیام کے بعد پہلی مرتبہ فیصل آباد میں ہندو نوجوان کی بطور اے ایس پی تعیناتی پر پولیس حکام بھی پر امید ہیں۔ اس حوالے سے پولیس حکام کا کہنا ہے کہ ’راجیندر امن و امان کے ساتھ ساتھ اقلیتوں کے مسائل حل کرنے میں معاون ثابت ہوں گے، یہ ہماری خوش قسمتی ہے کہ ہمارے پاس ایک ہندو افسر ہے، ان کی شمولیت فیصل آباد میں بہت اچھی ثابت ہوگی اس سے پولیس میں انکلوسیویٹی کا کانسیپٹ بڑھے گا‘۔
نوجوان پولیس افسر راجیندر مہیگوار کا تعلق سندھ کے پسماندہ ترین ضلع بدین سے ہے۔ راجیندر نے سی ایس ایس امتحانات میں کامیابی کے بعد پولیس گروپ میں شمولیت اختیار کی۔
