اسٹاک مارکیٹ کا تاریخ میں پہلی بار ایک لاکھ پوائنٹس سے تجاوز کرنا حکومتی پالیسیوں پر بھروسے کی عکاس ہے، وزیراعظم

وزیراعظم شہباز شریف نے پاکستان اسٹاک ایکسچینج میں 100 انڈیکس کے ایک لاکھ پوائنٹس سے تجاوز کرنے پر پوری قوم کو مبارک باد دی۔ وزیر اعظم شہباز شریف نے کہا کہ اسٹاک ایکسچینج کا تاریخ میں پہلی مرتبہ ایک لاکھ پوائنٹس سے تجاوز کرنا حکومتی پالیسیوں پر کاروباری برادری اور سرمایہ کاروں کے بھروسے کی عکاسی کرتا ہے۔

انہوں نے کہا کہ اس سنگ میل کو عبور کرنے کے لیے حکومتی معاشی ٹیم اور ملک میں سرمایہ کاری کے فروغ کے لیے مصروف عمل حکام لائق تحسین ہیں۔ وزیراعظم نے کہا کہ انہوں نے اپنی قوم سے عہد کیا تھا کہ ملکی معاشی استحکام اور ملکی ترقی کے لیے ہر ممکن اقدام اٹھائیں گے۔

وزیراعظم کا کہناتھا کہ پاکستان کو ڈیفالٹ سے بچانے کے لیے اپنی سیاست کی قربانی دی، اللہ کے فضل و کرم سے یہ قربانی رائیگاں نہیں گئی، ملک میں مہنگائی کی شرح میں مزید کمی ہوئی ہے، شرح سود 15 فیصد اور ترسیلاتِ زر ریکارڈ سطح پر پہنچ چکے۔

شہباز شریف نے کہا کہ ملکی ترقی کے لیے یونہی محنت کرتے رہیں گے، ملکی استحکام و ترقی کے دشمن ملک کو دوبارہ ڈی ریل کرنے کی مزموم و ناکام کوششیں کر رہے ہیں، ملکی ترقی و خوشحالی کے دشمنوں کو اپنے مزموم مقاصد میں کامیاب نہیں ہونے دیں گے۔

واضح رہے کہ پاکستان اسٹاک ایکسچینج (پی ایس ایکس) نے آج نئی تاریخ رقم کی ہے، بینچ مارک کے ایس ای 100 انڈیکس ایک لاکھ پوائنٹس کا سنگ میل عبور کر گیا۔

Web Desk