-
-
دورہ پاکستان کے آخری مرحلے میں چیمپئنز ٹرافی کراچی کے مقامی ہوٹل پہنچا دی گئی ہے، کل جمعرات کو ٹرافی کو نیشنل اسٹیڈیم لایا جائے گا، شیڈول کے مطابق ٹرافی 25 نومبر تک کراچی میں رہے گی۔ چیمپئنز ٹرافی مزار قائد کے بعد موہاٹہ پیلس بھی جائے گی، ٹرافی کو عوامی نمائش کے لیے مختلف مقامات پر رکھا جائے گا اور نجی تعلیمی اداروں میں بھی نمائش ہوگی۔
ٹرافی 26نومبر کو افغانستان پہنچا دی جائے گی اور 28 نومبرتک افغانستان میں اس کی نمائش ہوگی، ٹرافی 10سے 13 دسمبر بنگلا دیش، 15سے 22 دسمبر جنوبی افریقا اور 25 دسمبر سے 5 جنوری تک آسٹریلیا میں ٹور پر رہے گی۔ چیمپئنز ٹرافی کا 6 سے 11 جنوری نیوزی لینڈ، 12سے 14 جنوری انگلینڈ میں ٹور طے ہے اورآخر میں 15سے 26 جنوری تک بھارت میں ٹور ہو گا۔
واضح رہے کہ ٹرافی کے دورہ پاکستان کا آغاز وفاقی دارالحکومت اسلام آباد سے ہوا تھا، چیمپئنز ٹرافی کو دامن کوہ، فیصل مسجد اور پاکستان مونومنٹ میوزیم، متعدد تعلیمی اداروں اور مختلف مقامات پر لے جایا گیا تھا، ٹرافی نےٹیکسلا، خانپور،ایبٹ آباد، مری اور نتھیا گلی کا بھی ٹور کیا تھا۔
آئی سی سی کی جانب سے میزبان ملک پاکستان کے لیے چیمپئنز ٹرافی کے اپنے منظور شدہ دورے میں تبدیلی کی گئی تھی اور تین شہروں اسکردو، ہنزہ اور مظفر آباد میں ٹرافی کا دورہ منسوخ کر دیا گیا تھا۔
