کراچی میں خواجہ سرا کمیونٹی نے دوسرے ہجڑا فیسٹیول کا اعلان کردیا۔ تفصیلات کے مطابق کراچی پریس کلب میں ڈاکٹرسارہ گل اوربندیا رعنا سمیت دیگر نے پریس کانفرنس کی جس میں ڈاکٹرسارہ گل کا کہنا تھاکہ رواں سال ہجڑا فیسٹیول کی تھیم خواجہ سراؤں کے وجود کی شناخت ہے۔
انہوں نے اعلان کیا کہ ہجڑا فیسٹیول 9 نومبر کوکراچی فریئر ہال میں ہوگا اور رواں سال ہجڑا فیسٹیول کے آغاز سے پہلے ریلی نکالی جائے گی۔ بندیا رعنا کا کہنا تھاکہ فیسٹیول کے ذریعے ہم اپنے مطالبات بھی حکومت کے سامنے رکھیں گے، انہوں نے مزید کہا کہ ملازمت میں خواجہ سراؤں کا کوٹہ ان کو دیاجائے۔
واضح رہے کہ اس سے قبل کراچی میں خواجہ سرا کمیونٹی کی جانب سے ہجڑا فیسٹیول کا انعقاد نومبر 2023 میں کیا گیا تھا جس میں بڑی تعداد میں خواجہ سراؤں اور سول سوسائٹی کے اراکین نے شرکت کی تھی۔ اس موقع پرخواجہ سراؤں نے بینرز اور پلے کارڈز اٹھا رکھے تھے جن پر ان کے مطالبات درج تھے
