پاکستان اٹامک انرجی کمیشن نے کراچی نیوکلیئر پاور پلانٹ یونٹ کے تھری کو قومی گرڈ سے جوڑ دیا ہے۔ 1100 میگاواٹ پیداواری صلاحیت کے حامل نیوکلیئر پاور پلانٹ کو 21 فروری کو فعال کر دیا گیا تھا۔
گرڈ اسٹیشن سے منسلک کرنے سے پہلے نئے پاور پلانٹ کو کچھ حفاظتی ٹیسٹوں اور رائج طریقہ کار سے گزارا گیا۔ جمعہ کو اس پلانٹ کو آزمائشی بنیاد پر گرڈ سے منسلک کر دیا گیا ہے اور توقع ہے کہ مکمل پاور حاصل کرنے کے بعد جلد ہی اس کا افتتاح کر دیا جائے گا۔
پاکستان اٹامک انرجی کمیشن کی جانب سے جاری پریس ریلیز کے مطابق کے تھری پاکستان کا دوسرا نیو کلیئرپاور پلانٹ ہے جس کی پیداواری صلاحیت 1100 میگاواٹ ہے اور اس کے قومی گرڈ میں شامل ہونے سے یقینی طور بجلی کے نرخ کو کم کرنے میں مدد ملے گی۔
چیئرمین پاکستان اٹامک انرجی کمیشن محمد نعیم نے اس موقع پر پراجیکٹ کی ٹیم اور پوری قوم کو مبارکباد دی ہے اور امید ظاہر کی ہے کہ کمیشن بین الاقوامی ایٹمی توانائی ایجنسی کے معیارات کے تحت اپنے نیو یوکلیئر پاور پلانٹس کو چلا کر قوم کی خدمت جاری رکھے گا۔
