کراچی میں اسٹریٹ کرائم کے دوران شہری کو قتل کرنے والے مجرمان کو عدالت نے سزائے موت کا حکم سنادیا۔ عدالت نے 4 کرمنلز کو دو دو مرتبہ سزائے موت کا حکم دیا۔
کراچی کی ایڈیشنل ڈسٹرکٹ اینڈ سیشن کورٹ غربی کے جج نے ڈکیتی کے دوران شہری کی جان لینے والے مجرموں کو سخت سزا دینے کا فیصلہ سنایا۔ عدالت نے 4 رکنی ڈکیت گینگ کے مجرمان پر نہ صرف 5 ، 5 لاکھ روپے جرمانہ عائد کیا بلکہ دو دو مرتبہ سزائے موت کا حکم بھی دے دیا۔
روزنامہ جنگ کی رپورٹ کے مطابق عدالت نے اپنے ریمارکس میں کہا کہ کراچی میں ڈکیتی اور چوری کی وارداتوں نے تباہی مچا دی ہے، ڈاکو سفاکانہ کارروائیاں کرتے ہیں اور دورانِ ڈکیتی شہریوں پر تشدد بھی کرتے ہیں۔
ڈکیتی کی وارداتوں سے شہریوں کو ذہنی اور جسمانی نقصان پہنچتا ہے، شہر میں ڈکیتیوں کی وارداتوں سے معاشی اور سماجی ترقی بھی متاثر ہوتی ہے۔ عدالت نے حکم دیا کہ پولیس ان ڈکیت اور چور گروپوں کے خلاف سخت کارروائی کرے۔
عدالت نے کہا کہ ڈکیت گروہ نے سفاکانہ طور 1 شہری کو قتل اور 2 کو زخمی کیا، ڈکیتوں کی فائرنگ سے 1 شہری مستقل طور پر معذور ہو چکا ہے، اس طرح کے جرائم شہریوں کی نفسیات پر گہرے اثرات مرتب کرتے ہیں۔
پولیس کے مطابق 20 اگست 2018ء کو ان 4 ڈاکوؤں نے سرجانی ٹاؤن میں دکان میں لوٹ مار کی تھی، مزاحمت پر ملزمان کی فائرنگ سے 1 شخص جاں بحق اور 2 زخمی ہو گئے تھے۔
