سترہ سال کے طویل عرصے بعد پاکستان کا دورہ کرنے والی انگلینڈ کی ٹیسٹ ٹیم نے پہلے ٹیسٹ کی پہلی اننگز میں ہی رنز کے انبار لگادئے۔ انگلینڈ کے بلے بازوں نے متعدد ریکارڈز بھی قائم کردئے۔
راولپنڈی کرکٹ اسٹیڈیم میں کھیلے جارہے میچ میں انگلینڈ نے ٹاس جیت کر پہلے بیٹنگ کی اور پہلے دن کے اختتام پر 4 وکٹوں پر 506 رنز بنائے تھے اور اسطرح ٹیسٹ کرکٹ کی تاریخ میں میچ کے پہلے روز سب سے زیادہ رنز بنانے کا ریکارڈ قائم کیا تھا۔
پاکستانی باؤلرز نے میچ کے دوسرے روز کم بیک کیا اور انگلینڈ کی پوری ٹیم کو 657 رنز پر آل آؤٹ کردیا۔ پاکستان کی جانب سے زاہد محمود نے سب سے زیادہ 4 وکٹیں لیں۔
نسیم شاہ نے 3 اور محمدعلی نے ایک کھلاڑی کو آؤٹ کیا۔ حارث رؤف کے حصے میں ایک وکٹ آئی۔ آغا سلمان اور سعود شکیل سے بھی باؤلنگ کروائی گئی لیکن دونوں کوئی وکٹ نہ لے سکے۔
انگلینڈ کی جانب سے ہیری بروک نے 153 رنز کی اننگز کھیلی۔ زیک کرالی نے 122، اولی پوپ نے 108 اور بین ڈکٹ نے بھی 107 رنز کی شاندار اننگز کھیلی۔
کپتان بین اسٹوکس 41، اولی روبنسن 37، ول جیکس 30، جو روٹ 23، لیام لیونگسٹون 9 اور جیمز اینڈرسن 6 رنز بناکر آؤٹ ہوئے۔ جیک لیچ 6 رنز بناکر ناٹ آؤٹ رہے۔
