-
-
چیف شماریات ڈاکٹر نعیم الظفر نے کہاہے کہ پاکستان ادارہ شماریات نے اپنے مرتب کردہ اعداد و شمار کو صارفین کی وسیع تعداد تک پہنچانے اور اس سے استفادہ کے حصول کو یقینی بنانے کے لئے قومی اعداد و شمار کی تقسیم کی پالیسی تشکیل دے رہا ہے۔
اس مقصد کے لیے پی بی ایس یو این ایف پی اے کی مدد سے ڈائیلاگ ورکشاپس میں ڈیٹا پروڈیوسرز اور صارفین دونوں کو مشغول کر رہا ہے تاکہ متنوع نقطہ نظر جمع کیے جا سکیں، ضروریات کی نشاندہی کی جا سکے اور ڈیٹا کے پھیلاؤ کے عمل میں موجود خلا کو پر کیا جا سکے۔
یہ ورکشاپس مختلف ڈیٹا صارفین اور پروڈیوسرزبشمول سرکاری اداروں (جیسے صوبائی بیوروز اور کراپ رپورٹنگ سسٹم وغیرہ) کے درمیان تعاون کو فروغ دیں گی۔ مزید یہ کہ وہ اعداد و شمار کی ضروریات کی زیادہ جامع تفہیم کو یقینی بنائیں گے اور اس کے نتیجے میں پالیسی سازوں اور منصوبہ سازوں کے لئے شماریاتی معلومات کے معیار اور رسائی میں اضافہ کریں گے.
یہ حکمت عملی گورننس کی مختلف سطحوں پر ثبوت پر مبنی فیصلہ سازی کو یقینی بنائے گی۔ یہ بات انہوں نے پیر کو ڈیٹا ورکس شاپس کے سلسلے کی دوسری ورکشاپ سے کراچی میں خطاب میں کہی۔
ورکشاپ میں ڈیٹا صارفین، محققین، ڈیموگرافرز اور دیگر اسٹیک ہولڈرز، ممبر (ایس ایس/ آر ایم) محمد سرور گوندل، ممبر (سی اینڈ ایس) ایاز الدین اور پی بی ایس کے دیگر سینئر افسران نے معزز مہمانوں کوخوش آمدید کہا۔
چیف شماریات ڈاکٹر نعیم الظفر نے فورم کو آگاہ کیا کہ پی بی ایس نے ڈیٹا صارفین کو ضروری معلومات تک رسائی میں درپیش چیلنجز سے نمٹنے کے لئے فعال نقطہ نظر اپنایا ہے۔ ملک گیر ورکشاپس کی میزبانی کا اقدام ڈیٹا کی دستیابی اور صارفین کی ضروریات کے درمیان خلا ء کو ختم کرے گا۔
ڈیٹا صارفین کی ابھرتی ہوئی ضروریات کو مدِ نظر رکھتے ہوئےاور رسائی کے چیلنجز کو تسلیم کرتے ہوئے ، پی بی ایس زیادہ جامع اور باخبر ڈیٹا کے پھیلاؤ کے عمل کی راہ ہموار کر رہا ہے۔یہ ورکشاپس فیڈ بیک جمع کرنے، صارفین کو ڈیٹا تک رسائی دینے اور اس کے استعمال کو بہتر بنانے کے لئے تعاون کو فروغ دینے میں مددگار ثابت ہوں گی۔
ممبر (ایس ایس / آر ایم) محمد سرور گوندل نے اس بات پر روشنی ڈالی کہ ویب پر مبنی ڈیٹا کے پھیلاؤ کے لئے حکمت عملی تیار کرنا آج کے ڈیجیٹل منظر نامے میں بہت اہمیت کا حامِل ہے۔
اعداد و شمار کے پھیلاؤ کے لئے شراکت داری قائم کرنے سے شیئر کی جانے والی معلومات کی رسائی اور اثر کو بڑھایا جاسکتا ہے۔ پاکستان میں ایک منظم فیڈ بیک میکانزم قائم کرنے کا آئیڈیا ڈیٹا کے پھیلاؤ کے طریقوں میں مسلسل بہتری کو یقینی بنانے میں مدد کرسکتا ہے۔
چونکہ آسانی سے قابل رسائی ڈیٹا باخبر اور بروقت فیصلہ سازی کے عمل کو آسان بنانے میں اہم کردار ادا کرتا ہے۔لہذاورکشاپ کے ذریعے مردم شماری کے اعداد و شمار تک رسائی میں چیلنجزسے نمٹنے ، رکاوٹوں کو سمجھنے اور ان کا حل تلاش کر کے اس اہم معلومات کی افادیت اور رسائی میں نمایاں بہتری لائی جاسکتی ہے۔
یو این ایف پی اے پاکستان کے نمائندے بہرام گل نے مائیکرو لیول ڈیٹا شیئر کرنے کی اہمیت پر زور دیتے ہوئے کہا کہ اس ڈیٹا کو قابل رسائی بنا کر تحقیق اور تجزیہ اور خاص طور پر مقامی رجحانات اور ضروریات کو سمجھنے میں ایک قابل قدر ذریعہ بنایا جا سکتا ہے۔
یہ نقطہ نظر پالیسی سازوں کو کمیونٹیز کے بارے میں ایک باریک نقطہ نظر پیش کرتا ہے ، جس سے انہیں مخصوص مقامی چیلنجوں سے نمٹنے کے لئے زیادہ واضح طور پر ہدف شدہ پالیسیاں تشکیل دینے کے قابل بنایا جاتا ہے۔
یو این ایف پی اے کے ڈی جی (بیورو آف سندھ) محترمہ بہرام گل، ڈاکٹر اسحاق انصاری اور سی ای او (سندھ رورل سپورٹ آرگنائزیشن) دتل کلہوڑو شامل ہیں ،کو یادگاری شیلڈز پیش کی گئیں۔
ورکشاپ کے شرکا پر مشتمل پانچ گروپس جن کا پس منظر مختلف ہے، ورکشاپ کے مندرجہ ذیل موضوعاتی شعبوں پر غور و خوض اور اپنی سفارشات مرتب کرنے کے لئے تشکیل دیئے گئے ہیں۔
صارف کی ابھرتی ہوئی ضروریات اور ڈیٹا کی ضروریات، ڈیٹا کے پھیلاؤ اور رسائی میں چیلنجز، ویب پر مبنی ڈیٹا کے پھیلاؤ کے لئے حکمت عملی، اعداد و شمار کے پھیلاؤ کے لئے شراکت داری، پاکستان میں اعداد و شمار کے پھیلاؤ پر منظم رائے کا طریقہ کار۔
تمام گروپوں نے موضوعاتی شعبوں سے متعلق اپنی تجاویز اور سفارشات پیش کیں۔ورکشاپ شرکاء کو مشغول کرنے ، متعلقہ مسائل پر تبادلہ خیال کرنے ، قیمتی آراء جمع کرنے اور ڈیٹا پروڈیوسروں اور صارفین کے مابین مضبوط تعاون کی توقعات کو فروغ دینے میں کامیاب رہی۔
یہ ورکشاپ نہ صرف اعداد و شمار کے عمل کو مضبوط بنانے اور ڈیٹا پروڈیوسرز اور صارفین کے درمیان اعتماد کو فروغ دینے میں مدد کرے گی بلکہ معلومات کے قابل اعتماد ہونے اور اسکی رسائی کو یقینی بنانے میں اہم کردار ادا کرے گی ۔
بہترین طور پر مرتب کردہ قومی اعداد و شمار کے پھیلاؤ کی پالیسی ثبوت پر مبنی فیصلہ سازی اور موثر منصوبہ بندی کے لئے انتہائی اہمیت کی حامل ہے ، جو بالآخر کسی بھی ملک کی خوشحالی میں اہم کردار ادا کرتی ہے۔