الیکشن کمیشن آف پاکستان نے ووٹ ڈالنے کے لئے مختلف شرائط و ضوابط بنارکھے ہیں۔ جس پر عمل کرتے ہوئے کوئی بھی شہری اپنے من پسند افراد کو باآسانی ووٹ ڈال کر اپنا حق رائے دہی استعمال کرسکتا ہے۔
الیکشن کمیشن آف پاکستان کے اعلان کردہ شرائط و ضوابط کے مطابق ووٹ ڈالنے کے لئے مختلف مراحل ہیں جن عمل کرتے ہوئے شہریوں کو ووٹ کا حق استعمال کرنا ہوتا ہے۔
پہلا مرحلہ
شہری ووٹ ڈالنے کیلئے پولنگ اسٹیشن پہنچے گا۔ پولنگ افسر اصل قومی شناختی کارڈ اور انتخابی فہرست مین درج تفصیلات چیک کرے گا اور شہری کا نام اور سلسلہ نمبر بلند آواز سے پولنگ ایجنٹس کو پکارا جائے گا۔
پولنگ ایجنٹ کو نام پکارنے کے بعد انتخابی فہرست سے نام کاٹ دیا جائے گا، اس کے بعد شہری کے انگھوٹے کا نشان لیا جائے گا اور اانگھوٹے کے ناخن کے جوڑ پر فوری نہ مٹںے والی سیاہی کا نشان لگا دیا جائے گا۔
دوسرا مرحلہ
مطلوبہ کاؤنٹر پر انگھوٹے کے نشانات لگوانے کے بعد قومی اور صوبائی اسمبلی کے اسسٹنٹ پریزائڈنگ افسران بیلٹ پیپرز جاری کریں گے۔ بیلٹ پیپر کی پشت پر دستخط اور مہر ثبت کرنے کے بعد بیلٹ پیپر برائے قومی اسمبلی ( سبز رنگ ) اور بیلٹ پیپر برائے صوبائی اسمبلی ( سفید رنگ ) جاری کیا جائے گا۔
تیسرا مرحلہ
بیلٹ پیپر ملنے کے بعد شہری ووٹنگ اسکرین کے پیچھے جائے گا اور بیلٹ پیپرز پر اپنی پسند کے کسی ایک امیدوار کے انتخابی نشان پر درست طریقے سے مہر لگائے گا۔ مہر اپنے پسندیدہ امیدوار کے نشان پر اسطرح لگانی ہے کہ مہر صرف اس مخصوص خانہ تک محدود رہے۔
چوتھا مرحلہ
بیلٹ پیپرز پر اپنے پسندیدہ امیدوار کو ووٹ دینے کے بعد شہری سبز رنگ کا بیلٹ پیپرسبز ڈھکن والے بیلٹ باکس اور سفید رنگ کا بیلٹ پیپر سفید ڈھکن والے بیلٹ باکس میں ڈالیں۔
ضروری ہدایات
شہری اپنا اصل قومی شناختی کارڈ ہمراہ لائیں، زائد المعیاد قومی شناختی کارڈ بھی قابل قبول ہوگا، فوٹوکاپی قابل قبول نہیں ہوگی، قومی شناختی کارڈ کے علاوہ کوئی اور دستاویز قابل قبول نہیں ہوگی۔
مریضوں، حاملہ خواتین، معذور افراد، بزرگ شہریوں اور خواجہ سراؤں کو پولنگ کے عمل میں ترجیح دی جائے گی۔ ووٹ کی رازداری کا ہر حال میں خیال رکھیں۔ پولنگ اسٹیشن کے اندر موبائل فون اور کیمرہ لانے کی اجازت نہیں ہے۔
پولنگ کا مقررہ وقت کے ختم ہونے کے بعد بھی پولنگ اسٹیشن کی حدود میں موجود ووٹرز اپنا ووٹ ڈال سکتے ہیں۔
