پاکستان مسلم لیگ ن کی نائب صدر مریم نواز عدالتی حکم سے پاسپورٹ ملتے ہی ساڑھے چار سال بعد لاہور سے لندن روانہ ہوگئی ہیں۔ مریم نواز اپنے والد نواز شریف سے ملاقات اور سرجری کیلئے لندن روانہ ہوئی ہیں۔
ن لیگی رہنما کو گزشتہ شام لاہور ہائیکورٹ کے حکم پر پاسپورٹ واپس کیا گیا تھا، پاسپورٹ کی وصولی کے بعد آج صبح مریم نواز لاہور اپنی قیام گاہ سے ایئرپورٹ پہنچیں، ان کا ذاتی عملہ بھی لندن جانے کے لیے ان کے ہمراہ تھا۔
Maryam Nawaz at Lahore airport just before leaving .. pic.twitter.com/g15zYKxF0M
— Sania Ashiq (@SaniaaAshiq) October 5, 2022
لاہور ایئر پورٹ پر مریم نواز کے ساتھ شہریوں نے سیلفیاں لیں۔ روانگی سے قبل ایئرپورٹ پر مریم نواز نے کہا میں والد سے ملنے کے لیے بے چین ہوں۔ مریم نواز نے روانگی سے قبل جاتی امرا میں اپنے دادا، دادی اور والدہ کی قبروں پر حاضری دی اور فاتحہ خوانی کی۔
ن لیگی رہنما نجی ایئر لائن سے براستہ دوحہ لندن پہنچیں گی اور ایک ماہ لندن میں قیام کریں گی، لندن میں نواز شریف، حسن نواز اور حسین نواز ان کا استقبال کریں گے، مریم نواز والدہ کے انتقال کے بعد پہلی بار اپنے بھائیوں سے ملاقات کریں گی۔
واضح رہے کہ پاکستان مسلم لیگ ن کی نائب صدر مریم نواز نے عدالتی حکم کے بعد گزشتہ شام لاہور ہائیکورٹ کے ڈپٹی رجسٹرار جوڈیشل کےآفس پہنچ کر اپنا پاسپورٹ وصول کیا تھا۔
