پاکستان پیپلز پارٹی کے رہنما ، وزیر اطلاعات سندھ سعید غنی بلدیات انتخابات کی مہم میں شرکت کے لئے عہدے سے مستعفی ہوگئے ہیں لیکن انکا استعفٰی تاحال منظور نہیں ہوا ہے۔
وزیر محنت و اطلاعات سندھ سعید غنی نے سوشل میڈیا پیغام کے ذریعے عہدے سے مستعفیٰ ہونے کی تصدیق کی۔ سعید غنی کا کہنا ہے کہ انہوں نے دو روز قبل استعفیٰ وزیر اعلی سندھ کو بھجوایا ہے۔
سعید غنی کا کہنا ہے کہ بحیثیت صدر پیپلز پارٹی کراچی ڈویژن بلدیاتی انتخابات کی مہم میں حصہ لینا چاہتے ہیں جس کی وجہ سے انہوں نے عہدے سے مستعفی ہونے کا فیصلہ کیا ہے۔
میں نے الیکشن مہم میں حصہ لینے کیلئے صوبائی کابینہ سے استعفی وزیر اعلی کو سندھ بھجوایا ہے جو تاحال منظور نہیں ہوا۔ بحیثیت صدر پی پی پی کراچی میری یہ خواہش ہے کہ میں کارکنوں کے ساتھ الیکشن مہم میں حصہ لوں۔ استعفی کے منظوری کا فیصلہ پارٹی قیادت اور وزیر اعلی صاحب نے کرنا ہے۔
— Senator Saeed Ghani (@SaeedGhani1) August 19, 2022
وزیراطلاعات سندھ سعید غنی کے مطابق صوبائی کابینہ نے انکا استعفٰی تاحال منظور نہیں کیا ہے۔ استعفیٰ کی منظوری کا فیصلہ پارٹی قیادت اور وزیراعلیٰ سندھ مراد علی شاہ نے کرنا ہے۔
میڈیا رپورٹس کے مطابق سعیدغنی کا استعفیٰ صوبائی کابینہ کو موصول ہوگیا ہے لیکن اسکی منظوری یا مسترد کرنے کا فیصلہ چیئرمین پیپلز پارٹی بلاول بھٹو زرادی کریں گے۔
واضح رہے کراچی سمیت سندھ کے دیگر اضلاع میں بلدیاتی انتخابات کے دوسرے مرحلے میں پولنگ 28 اگست ہوگی جسکے لئے تمام جماعتیں انتخابی مہم میں مصروف ہیں۔
ایم کیو ایم نے شہری علاقوں میں حلقہ بندیوں پر اعتراضات کرتے ہوئے سپریم کورٹ میں بلدیاتی الیکشن روکنے کیلیے درخواست دائر کی تھی جس کو عدالت عظمیٰ نے مسترد کرتے ہوئے الیکشن مقررہ وقت پر کرانے کا حکم دیا ہے۔
