سابق صدر آصف علی زرداری نے پی ٹی آئی چیئرمین عمران خان کو شدید تنقید کا نشانہ بناتے ہوئے کہا ہے کہ ایک شخص فوج، پولیس اور عدلیہ کو دھکمیاں دے رہا ہے، اسے اقتدار کا نشہ پاگل کررہا ہے۔ اداروں اور حکومت کو اپنی رٹ قائم کرنا پڑے گی۔
صوبائی وزرا سے ملاقات میں سابق صدر نے کہا کہ ایک شخص ہر روز ہماری فوج پر تنقید کر رہا ہے اور اسی فوج کے افسران و سپاہی دو صوبوں میں دہشت گردوں سے جنگ میں اپنی جان کا نذرانہ پیش کررہے ہیں۔
سابق صدر کا کہنا تھا کہ ملک میں ایک شخص کو دن بہ دن اقتدار کا نشہ اس کو پاگل کر رہا ہے۔ یہ شخص فوج ، پولیس اور اب ایک خاتون مجسٹریٹ کو یہ شخص دھمکیاں دیتا ہے اور ساتھ کہتا ہے کہ مجھے گرفتار کرکے دکھاؤ ۔
آصف زرداری نے کہا کہ عدلیہ کو دیکھنا ہوگا کہ کیا یہ شخص قانون سے بالاتر ہے ۔ کیا یہ شخص میرے، نواز شریف ، میری بہن اور مریم بیٹی کے خلاف ماورائے قانون انتقامی کاروائیاں کرسکتا ہے اور خود ہر قانون کو روند سکتا ہے ۔
انہوں نے کہا کہ ادوار ں اور حکومت کو اپنی رٹ قائم کرنی پڑے گی ورنہ قانون، آئین اور ادارے اسی طرح اس شخص کی ہوس کی بھینٹ چڑھتے رہیں گے۔
آصف علی زرداری نے کہا کہ چاروں صوبوں میں اس وقت بارشوں کی وجہ سے ہنگامی صورتحال کا سامنا ہے، ہم سب کو اس وقت سیاست چھوڑ کر صرف متاثرین کی طرف توجہ دینی چاہیے، چاروں صوبوں میں متاثرین سیلاب کی نگاہیں ہماری طرف ہیں۔
