-
-
متحدہ عرب امارات کے شہر دبئی میں پبلک ٹرانسپورٹ کے مسافروں کی پیدل چلنے کی حوصلہ افزائی کیلئے مفت اسمارٹ چھتری سروس کا آغاز کیا گیا ہے۔ ابتدائی طور پر یہ سروس 3 ماہ کیلئے تجرباتی طور پر شروع کی گئی ہے۔
اردو نیوز کی ایک رپورٹ کے مطابق دبئی میں روڈ ٹرانسپورٹ اتھارٹی (آر ٹی اے) کی جانب سے کینڈا کی معروف اسمارٹ امبریلا شیئر سروس کمپنی ’امبرہ سٹی‘ کے تعاون سے یہ سروس شروع کی گئی ہے۔
مفت اسمارٹ چھتری سروس دبئی کے الغبیبہ بس اور میٹرو اسٹیشن پر شروع کی گئی ہے۔ اگر یہ سروس کامیاب رہی تو اسے تین ماہ بعد دیگر بس اور میٹرو اسٹیشنز پر بھی شروع کیا جائے گا۔
رپورٹ کے مطابق مفت اسمارت چھتری سروس کا مقصد دبئی میں پیدل چلنے کی حوصلہ افزائی ہے۔ یہ سروس خاص طور پر ڈیزائن کی گئی ہے تاکہ یہاں کے رہائشی اپنی روزمرہ کی ضروریات پیدل یا بائیک کے ذریعے 20 منٹ کے اندر پوری کرسکیں۔
یہ چھتری پیدل چلنے والوں کو دھوپ اور بارش سے بھی بچانے میں سہولت فراہم کرتی ہے۔
دبئی میں روڈ اینڈ ٹرانسپورٹ اتھارٹی میں پبلک ٹرانسپورٹ ایجنسی کے ٹرانسپورٹیشن سسٹم ڈیپارٹمنٹ کے ڈائریکٹرخالد العوضی نے کہا کہ اسمارٹ چھتریاں نول کارڈ استعمال کرتے ہوئے مفت حاصل کی جا سکتی ہیں۔
امبرہ سٹی کے سی ای او امیر انتزاری نے کہا کہ آر ٹی اے کے ساتھ شراکت داری پر فخر ہے۔ اس پروجیکٹ کے ذریعے ہم اسمارٹ او پائیدار شہری زندگی کے لیے ایک عالمی معیار قائم کررہے ہیں۔
