-
-
نگراں وزیر اطلاعات و نشریات مرتضیٰ سولنگی کا کہنا ہے کہ عدالت کہتی ہے نواز شریف کو گرفتار کر کے جیل بھیجیں تو حکم پر عمل کریں گے۔
اے آر وائی نیوز کے پروگرام ’آف دی ریکارڈ‘ میں گفتگو کرتے ہوئے مرتضیٰ سولنگی نے کہا کہ ابھی نہیں لگتا کہ نواز شریف کو کوئی بڑا ریلیف ملے گا، تمام فیصلے ہمیشہ کیلیے نہیں ہوتے بلکہ کچھ تبدیل بھی ہو جاتے ہیں، مستقبل میں کیا ہوگا اس سے متعلق کچھ کہا نہیں جا سکتا۔
مرتضیٰ سولنگی نے کہا کہ انتظار کریں گے نواز شریف آنے سے پہلے اپنے دفاع کیلیے کیا کریں گے، عدالت کہتی ہے نواز شریف کو گرفتار کر کے جیل بھیجیں تو حکم پر عمل کریں گے، اگر عدالت ان کو گرفتار نہ کرنے کا حکم دیتی ہے تو اس پر بھی عمل ہوگا۔
انہوں نے کہا کہ عدالت کے فیصلے اور قانون کے مطابق سابق وزیر اعظم کی واپسی پر فیصلہ کریں گے، ان کو عدالت نے بیرون ملک جانے کی اجازت دی تھی، وہ کوئی ڈیل کرکے گئے تھے یا نہیں اس بارے میں نہیں معلوم۔
مرتضیٰ سولنگی نے کہا کہ پی ٹی آئی جلسہ کرنا چاہتی ہے تو انہیں اجازت ملنی چاہیے، اگر انہیں اجازت نہیں ملتی تو مختلف پلیٹ فارم موجود ہیں۔
انہوں نے کہا کہ جلسے کی اجازت تمام رجسٹرڈ سیاسی جماعتوں کو ہونی چاہیے، جو ادارے میرے ماتحت ہیں ان پر پی ٹی آئی کے جلسے کی کوریج ہوگی، سرکاری ٹی وی پر بھی جلسہ دکھایا جائے گا۔
