-
-
قومی ٹیم کے کپتان بابر اعظم نے ایشیا کپ کے دوران انجریز کا شکار ہونے والے فاسٹ بولرز حارث رؤف اور نسیم شاہ کی صحتیابی اور اگلے ماہ سے شروع ہونے والے ورلڈ کپ میں شرکت سے متعلق گفتگو کی ہے۔
میچ کے بعد پریس کانفرنس میں پاکستان کرکٹ ٹیم کے کپتان بابر اعظم پرامید ہیں کہ دونوں فاسٹ بولرز (حارث اور نسیم) ورلڈکپ میں 6 اکتوبر کو نیدر لینڈ کے خلاف پہلے میچ سے قبل مکمل فٹ ہو جائیں گے۔
تاہم جب حارث رؤف اور نسیم شاہ کی غیر موجودگی میں دوسرے پلان سے متعلق پوچھا گیا تو انہوں نے واضح جواب دینے کے بجائے صرف اتنا کہا کہ میں آپ کو بعد میں بتاؤں گا۔
بابر اعظم کا کہنا تھا ابھی اپنا پلان بی آپ کو نہیں بتا سکتا لیکن یہ ضرور کہوں گا کہ حارث رؤف کی انجری کوئی بڑی نہیں ہے اور وہ ورلڈکپ سے پہلے مکمل فٹ ہو جائیں گے۔
نسیم شاہ کے حوالے سے بابر اعظم کا کہنا تھا نہیں معلوم کہ نسیم شاہ کب تک فٹ ہوں گے لیکن مجھے امید ہے کہ وہ بھی ورلڈکپ میں ٹیم کا حصہ ہوں گے۔
قومی ٹیم کے فاسٹ بولرز حارث رؤف اور نسیم شاہ بھارت کے خلاف میچ میں انجریز کا شکار ہوئے تھے، حارث رؤف پسلیوں میں تکلیف کے باعث بھارت کے خلاف اپنے اوورز کا کوٹا بھی مکمل نہیں کر سکے تھے جبکہ نسیم شاہ کندھے کی انجری کا شکار ہو کر ایشیا کپ سے باہر ہو گئے تھے۔
