-
-
شہرقائد میں اعلٰی ثانوی تعلیمی بورڈ کراچی کے تحت گیارہویں اور بارہویں جماعت کے امتحانات کا آغاز ہوگیا۔ انٹرمیڈیٹ کے تمام گروپس کے امتحانات لئے جارہے ہیں۔ تمام امتحانی مراکز پر دفعہ 144 نافذ ہے۔
انٹرمیڈیٹ کے امتحانات صبح اور شام کی شفٹوں میں لئے جارہے ہیں۔ مجموعی طور پر صبح اور شام کی شفٹوں میں 211 امتحانی مراکز قائم کئے گئے ہیں جس میں سے صبح کی شفٹ میں 117 اور شام کی شفٹ میں 94 مراکز پر امتحانات ہورہے ہیں۔
صبح 9 سے 12بجے تک سائنس پری میڈیکل، پری انجینئرنگ، سائنس جنرل اور ہوم اکنامکس گروپس کے امتحانات ہوں گے۔ دوپہر 2 بجے سے شام 5 بجے تک کامرس ، آرٹس ،خصوصی امیدواروں اور ڈپلومہ ان فزیکل ایجوکیشن کے امتحانات لیے جائیں گے۔
مجموعی طور پر59 امتحانی مراکز کو انتہائی حساس قرار دیا گیا ہے۔ امتحانات کے پرامن و بلاتعطل انعقاد اور طلبہ کی سہولت کے لیے پولیس رینجرز حکام سے مدد طلب کی گئی ہے ۔
امتحانات میں نقل کی روک تھام کے لیے پچھلے سال کی طرح اس سال بھی خصوصی انتظامات کیے گئے ہیں۔ امتحانی مراکز کے اطراف دفعہ 144 نافذ ہوگی۔ امتحانی مراکز میں موبائل فون، ٹیبلٹس، لیپ ٹاپ اور الیکٹرانک ڈیوائس لے جانے کی اجازت نہیں ہوگی۔ نقل کی روک تھام کے لیے ایم سی کیوز کا سوال نامہ پرچے کے آخری آدھے گھنٹے میں طلبہ کو دیا جائے گا۔
امتحانات میں ایک لاکھ 15 ہزار سے زائد طلبہ و طالبات شریک ہیں۔ آج سے شروع ہونے والے انٹرمیڈیٹ کے امتحانات منگل 27 جون تک جاری رہیں گے۔
