-
-
راولپنڈی ایکسپریس کے لقب سے مشہور پاکستان کے سابق فاسٹ باؤلر شعیب اختر نے ایک اور نئے کیرئیر کا آغاز کردیا۔ شعیب اختر نے معروف ویڈیو شیئرنگ پلیٹ فارم ٹک ٹاک پر انٹری دے دی۔ اور اس طرح شعیب اختر بھی باضابطہ طور پر ٹک ٹاکر بن گئے۔ ٹک ٹاک پر شعیب اختر کا اکاؤنٹ تصدیق شدہ ہے۔
بے باک تجزیوں اور اپنے منفرد انداز کے لئے مشہور شعیب اختر کے ٹک ٹاک جوائن کرنے کے چند گھنٹوں میں ہی انکے فالوورز کی تعداد 30 ہزار سے زائد ہوگئی جبکہ انکی پہلی ویڈیو کو بھی ساڑھے 3 لاکھ سے زائد لوگ دیکھ چکے ہیں۔
شعیب اختر نے ٹک ٹاک پر اپنی پہلی ویڈیو پوسٹ کرتے ہوئے پیغام میں لکھا کہ بلاآخر وہ ٹک ٹاک پر آگئے ہیں۔ انہوں نے ٹک ٹاک ایک اچھے مقصد کے لئے جوائن کیا ہے اور کوشش کریں گے کہ اسی پر عمل کریں۔
ویڈیو میں شعیب اختر نے پیغام دیا کہ انٹرنیٹ پر کوئی بھی چیز اپ لوڈ یا پوسٹ کرنے سے پہلے سوچیں کہ آپکے اس طرز عمل سے کسی کو نقصان تک نہیں ہورہا، کسی کی دل آزاری تو نہیں ہورہی، سوچ سمجھ کر انٹرنیٹ پر چیزیں اپ لوڈ کریں اور اپنا خیال رکھیں۔
شعیب اختر کا شمار پاکستان سمیت دنیا بھر کے عظیم کھلاڑیوں میں ہوتا ہے۔ دنیا بھر میں انکے چاہنے والے موجود ہیں۔ شعیب اختر کرکٹ میں اپنی برق رفتار باؤلنگ کی وجہ سے مشہور تھے۔ کرکٹ میں آج بھی تیزترین گیند کرانے کا ریکارڈ شعیب اختر کے پاس ہی ہے۔
