-
-
کراچی میں تعینات امریکا کی نئے قونصل جنرل نکول ٹیریو نے بانی پاکستان قائد اعظم محمدعلی جناح کے مزار پر حاضری دی اور انہیں خراج عقیدت پیش کیا۔
امریکی قونصل جنرل نکول ٹیریو نے گزشتہ ہفتے ہی کراچی میں چارج سنبھالا تھا۔ امریکی قونصل جنرل نے مزار قائد پر حاضری دی اور پھول چڑھائے۔ نکول ٹیریو نے مہمانوں کیلئے تاثراتی کتاب پرامریکی سفارتخانے کی جانب سے اپنے تاثرات درج کئے۔
نکول ٹیریو نے اپنے تاثرات میں لکھا کہ مزار قائد کا دورہ کرنا اور بانی پاکستان محمدعلی جناح کو خراج عقیدت پیش کرنا باعث فخر ہے۔ امریکا بانی پاکستان محمدعلی جناح کے متحد اور جمہوری پاکستان کے اعلٰی مقصد کو نہایت احترام کی نگاہ سے دیکھتا ہے۔
قونصل جنرل نکول ٹیریو نے پاکستان کے پہلے وزیر اعظم لیاقت علی خان اور قائد اعظم کی ہمشیرہ محترمہ فاطمہ جناح کے مزارات پر بھی حاضری دی۔ مزار قائد سے ملحقہ میوزیم کا دورہ بھی کیا اور قائداعظم محمد علی جناح کی زندگی سے متعلق نوادرات کو سراہا ۔
قونصل جنرل نے امریکی حکومت کے عزم کی توثیق کرتے ہوئے کہا کہ وہ دونوں ممالک کے باہمی اقتصادی تعلقات کو مزید مستحکم کرنے، دو طرفہ تجارت کو وسعت دینے، سرمایہ کاری کو فروغ دینے اور کاروباری اور تعلیمی معاملات کے فروغ کے لیئے کاوشیں جاری رکھیں گی
امریکی قونصل جنرل نے مزید کہا کہ وہ سندھ اور بلوچستان کے لوگوں کے ساتھ مل کر دونوں ممالک کے عوام کےدرمیان ثقافتی، تعلیمی اور اقتصادی تعلقات کو مزید موثر کرنے کی لئے کام کرتی رہیں گی۔
قونصل جنرل ٹیریو نے کہا کہ امریکہ کو پاکستان بھرمیں انسانی جانوں، زراع معاش اور گھروں کے تباہ کن نقصانات پر شدید دکھ ہے۔ انہوں نے کہا کہ امریکی عوام پاکستان بھر میں سیلاب سے متاثرہ لوگوں کی مدد کرنے کے لئے پر عزم ہیں۔
انہوں نے پاکستان کے برسات اور سیلاب متاثرین کی امداد کے لئے امریکی کوششوں کا ذکر کرتے ہوئے کہا کہ دونوں ممالک کی یکجہتی کے جذبے کے تحت، امریکہ نے، امریکی ایجنسی برائے بین الاقوامی ترقی کے ذریعے، 30 اگست کو پاکستان میں شدید سیلاب سے متاثر ہونے والے لوگوں کی مدد کے لیئے 30 ملین ڈالر کی اضافی امداد کا اعلان کیا۔
اس سے پہلے اگست کے اوائل میں امریکا کی جانب سے سیلاب متاثرین کے لیئے 1.1 ملین ڈالر کی گرانٹ اور پروجیکٹ سپورٹ بھی فراہم کی گئی تاکہ اس بات کو یقینی بنایا جا سکے کہ سب سے زیادہ متاثر ہونے والے افراد تک براہ راست امداد پہنچ سکے، تاکے ان لوگوں پر سیلاب کے اثرات کو کم کرنے میں مدد فراہم ہو سکے۔
