-
-
روس کے حملے کے بعد یوکرین میں جنگی صورتحال ہے اور شہروں سے لوگوں کا انخلا بھی جاری ہے۔ یوکرین میں پھنسے پاکستانی طلباء کی باحفاظت واپسی کیلئے پاکستان نے بھی آپریشن شروع کردیا ہے۔ میڈیا رپورٹس کے مطابق 35 طلباء کو پولینڈ کی سرحد سے ملحقہ ایک کیمپ میں بھی پہنچادیا گیا ہے۔
دفتر خارجہ کے ترجمان عاصم افتخار احمد کی جانب سے جاری بیان کے مطابق یوکرین میں زیر تعلیم 35 پاکستانی طلبا پولینڈ سے متصل ایک سرحد پر قائم کئے گئے کیمپ میں پہنچادیئے گئے ہیں۔
ترجمان دفتر خارجہ کے مطابق پولینڈ میں پاکستانی سفارت خانہ انہیں وارسا پہنچانے کے لیے انتظامات کررہا ہے۔ عاصم افتخار احمد کے مطابق یوکرین کے علاقے خارکیو سے مزید 30 سے 40 پاکستانی طلبا بذریعہ ٹرین آج کسی وقت پولینڈ کی سرحد پر پہنچیں گے۔
چوبیس فروری کو رس نے یوکرین میں اپنی فوجیں داخل کی تھیں، جس کے بعد یوکرین میں صورت ھال انتہائی خراب ہوگئی ہے۔ یوکرین کے دارالحکومت کیف سے ہزاروں لوگ محفوظ مقامات کی جانب نقل مکانی کرچکے ہیں لیکن لاکھوں لوگ اب بھی پھنسے ہیں۔
پاکستان نے بھی اپنا سفارت خانہ کیف سے ترنوپل منتقل کردیا ہے۔ پاکستانی سفارت خانے نے یوکرین میں موجود پاکستانی شہریوں کو ہدایت کی تھی کہ وہ ترنوپل پہنچیں جہاں سے انہیں ملک سے نکالنے کے لئے انتظامات کئے جائیں گے۔
