-
-
کراچی کے پہلے بس ریپڈ ٹرانزٹ منصوبہ گرین لائن پر پتھراؤ کے واقعات سامنے آئے ہیں۔ گرین لائن کے سیکیورٹی آفیسر کی جانب سے متعلقہ پولیس کو تحریری درخواست جمع کروائی گئی ہے۔
درخواست کے مطابق نمائش سے سرجانی جاتے ہوئے گرین لائن بس پر ایک مقام پر نامعلوم شر پسند کی جانب سے پتھر پھینکا گیا جس سے بس کا شیشہ ٹوٹ گیا اور گرین لائن کے اثاثے کو نقصان پہنچا، دیگر مقامات پر بھی بسوں پر پتھروں کیا گیا ہے۔درخواست میں شر پسندوں کے خلاف کارروائی کا مطالبہ کیا گیا ہے۔
ذرائع کا کہنا ہے کہ گزشتہ چند دنوں کے دوران مختلف چار مقامات پر گرین لائن بسوں پر پتھر پھینکے گئے ہیں۔ یاد رہے کہ گرین لائن کی سیکیورٹی کے حوالے سے 900 کیمرے اور ڈھائی سو اہلکاروں کی تعیناتی کا دعویٰ کیا تھا تھا۔
پولیس ذرائع کا کہنا ہے کہ منصوبے کی سیکیورٹی کے لیئے اتنے اقدامات کیے جانے کے باوجود بر پر پتھراؤ ہونے سے گرین لائن کی سیکیورٹی پر بھی سوالات کھڑے ہو گئے ہیں جبکہ گرین لائن منصوبے پر شرپسندوں کی جانب سے پتھراؤ کے معاملہ کے مختلف پہلوؤں پر غور کیا جارہا ہے۔
