-
-
محکمہ موسمیات نے شہرقائد سمیت سندھ کے دیگر شہروں گرمی کی نئی لہر کی پیشگوئی کردی۔ کراچی میں بھی ایک بار پھر درجہ حرارت میں اضافہ ہوگا اور شہر کا موسم گرم اور مرطوب رہے گا۔
میڈیا رپورٹس کے مطابق محکمہ موسمیات کے چیف میٹرولوجسٹ سردار سرفراز کا کہنا ہے کہ کراچی میں آج دن کے اوقات میں موسم گرم رہنے کا امکان ہے اور اس دوران شہر کا درجہ حرارت 40 سے 42 ڈگری سینٹی گریڈ تک پہنچ سکتا ہے۔
چیف میٹرولوجسٹ کے مطابق شمال مغرب سے گرم اور خشک ہوائیں چلنے کا امکان ہے۔ جبکہ شہر کے کئی مقامات پر محسوس کئے جانے والا درجہ حرارت 43 ڈگری سینٹی گریڈ تک بھی پہنچ سکتا ہے۔
سردار سرفراز نے گرمی میں اضافہ کے ساتھ شہریوں کیلئے راحت کی خبر بھی سنائی۔ محکمہ موسمیات کے مطابق شام کے اوقات میں کراچی میں سمندری ہوائیں بحال ہوجائیں گی جسکے باعث گرمی کی شدت میں کمی متوقع ہے۔
کراچی میں آنے والے چند دنوں میں موسم گرم اور مرطوب ہی رہنے کا امکان ہے۔ گرمی کی موجودہ لہر 25 مئی تک برقرار رہ سکتی ہے جسکے بعد شہرقائد میں گرمی کی شدت میں کمی کا امکان ہے۔
کراچی سمیت سندھ بھر میں گرمی کی لہر کے پیش نظر محکمہ موسمیات نے شہریوں سے غیرضروری گھروں سے باہر نہ نکلنے اور ٹھنڈے مشروبات کے استعمال کے ساتھ ساتھ زیادہ سے زیادہ پانی پینے کی درخواست کی ہے۔
