-
-
کراچی میں موسم نے کروٹ لی تو کے الیکٹرک نے ایک بار پھر شہریوں کا امتحان لینا شروع کردیا۔ شہرقائد میں گرمی کی شدت میں اضافے کے ساتھ ہی بجلی کی عدم فراہمی کی شکایات میں اضافہ ہو گیا۔
کراچی کے مختلف علاقوں میں سحر و افطار کے اوقات میں بھی لوڈشیڈنگ کی جانے لگی۔ ملیرسعود آباد، رفیع گارڈن ملیر سٹی، گلستان جوہر بلاک اٹھارہ ، لانڈھی، کورنگی اور لائنز ایریا سمیت مختلف علاقوں میں غیر اعلانیہ بجلی کی بندش سے لوگوں کو مشکلات کا سامنا ہے۔
شہریوں کا شکوہ ہے کہ کے الیکٹرک نے سحر و افطار کے اوقات میں بجلی بند نہ کرنے کا اعلان کیا تھا تاہم کے الیکٹرک کے تمام دعوے ہوا ہوگئے۔
میڈیا رپورٹس کے مطابق ترجمان کے الیکٹرک کا کہنا ہے کہ لوڈشیڈنگ میں اضافہ نیشنل گرڈ سے ترسیل میں کمی پر کیا گیا لیکن شہر کے بیشتر علاقوں میں بجلی کی ترسیل کا عمل معمول کے مطابق جاری ہے۔
ترجمان کے الیکٹرک کا کہنا ہے کہ نیشنل گرڈ سے 300 میگاواٹ بجلی کی کمی کا سامنا ہے۔ چند علاقوں میں لوڈشیڈنگ کا دورانیہ عارضی طور پر بڑھا دیا گیا ہے۔
میڈیا رپورٹس کے مطابق پاکستان کے دوسرے بڑے شہر لاہور اور راولپنڈی میں بھی بجلی کی غیراعلانیہ لوڈشیڈنگ میں اضافہ دیکھا گیا ہے۔ بجلی کی لوڈشیڈنگ کے باعث تاجر اور درزی بھی آرڈر وقت پر مکمل نہ کرنے کے باعث مشکلات کا شکار ہیں۔
