-
-
کراچی میں جمعہ کی دوپہر سے شروع ہونے والا گرد آلود ہواؤں کا سلسلہ اب بھی جاری ہے۔ گرد و غبار کے طوفان کی وجہ سے شہر قائد کی فضا کا معیار انتہائی خراب ہوگیا ہے۔ ایئر کوالٹی انڈیکس میں کراچی دنیا کے آلودہ ترین شہروں میں دوسرے نمبر پر آگیا۔
ایئر کوالٹی انڈیکس کے مطابق کراچی کی فضا میں آلودہ زرات کی مقدر 233 پرٹیکولیٹ میٹر ریکارڈ کی گئی ہے۔ یہ دنیا بھر کے شہروں میں دوسری سب سے زیادہ مقدار ہے۔ آلودہ ترین شہروں میں بنگلہ دیش کا دارلحکومت ڈھاکہ اس وقت سرفہرست ہے۔ جہاں آلودہ زرات کی مقدار 240 پرٹیکولیٹ میٹر ہے۔
ایئر کوالٹی انڈیکس کے مطابق دنیا کے آلودہ ترین شہروں میں پاکستان کا دوسرا بڑا شہر لاہور چھٹے نمبر پر ہے جہاں آلودہ زرات کی مقدار 182 ریکارڈ کی گئی ہے۔
ایئر کوالٹی انڈیکس کی درجہ بندی میں 151سے 200درجہ تک آلودگی صحت کے لئے نقصان دہ ہوتی ہے جبکہ 201سے 300درجہ تک آلودگی کو انتہائی مضرصحت قرار دیا جاتا ہے اور درجہ 300سے تجاوز کرنے پر خطرناک آلودگی کی شکل اختیارکرلیتا ہے۔
محکمہ موسمیات کے مطابق شہر قائد میں تیز گرد آلود ہوائیں آج شام تک چلنے کا امکان ہے۔ کراچی میں ہوائیں چلنے کی رفتار 35 کلو میٹر فی گھنٹہ ہے۔ ہوا میں گرد وغبار کی وجہ سے کئی مقامات پر حد نگاہ انتہائی کم ہوگئی ہے۔ محکمہ موسمیات نے شہریوں سے غیرضروری گھروں سے باہر نہ نکلنے اور احتیاط کرنے کی درخواست کی ہے۔
