-
-
پاکستان کرکٹ بورڈ نے کے پی ایل انتظامیہ کو لیگ کرانے کی اجازت دے دی۔ کشمیر پریمئیر لیگ میں ایک نئی فرنچائز کا بھی اضافہ ہو گیا ہے، کے پی ایل سیزن ٹو میں 6 کی بجائے اب 7 ٹیمیں ہوں گی۔
پاکستان کرکٹ بورڈ نے کے پی ایل 2022 کے دوسرے سیزن کے لیے این او سی جاری کر دیا، یہ سیزن سات فرنچائزز پر مشتمل ہوگا، لیگ کی ساتویں ٹیم جموں جانباز کے نام سے کھیلے گی۔
کشمیر پریمیئرلیگ کے سیزن ٹو کی ڈرافٹنگ عید الضحیٰ کے بعد کی جائے گی۔ لیگ کے میچز کیلئے پی سی بی نے یکم اگست سے 25 اگست تک کی ونڈو دی ہے۔
واضح رہے کہ کشمیر پریمیئر لیگ کے پہلے سیزن میں 6 ٹیموں نے شرکت کی تھی، جن میں راؤلاکوٹ ہاکس، مظفر آباد ٹائیگرز، میرپور رائلز، کوٹلی لائنز، باغ اسٹالینز، اوورسیز واریئرز شامل تھیں۔
پہلا سیزن شاہد آفریدی کی کپتانی میں کھیلنے والی راؤلا کوٹ ہاکس نے جیتا تھا، مظفر آباد ٹائیگرز دوسرے نمبر پر رہی تھی، میرپور رائلز تیسرے، اوورسیز واریئرز چوتھے، باغ اسٹالینز پانچویں اور کوٹلی لائنز چھٹے نمبر پر رہی تھی۔
بائیں ہاتھ سے کھیلنے والے جارح مزاج بلے باز شرجیل خان 296 رنز بنا کر پہلے سیزن کے ٹاپ اسکور رہے تھے، جب کہ سلمان ارشاد 16 وکٹیں حاصل کر کے سب سے زیادہ وکٹیں حاصل کرنے والے بالر قرار پائے تھے۔
