-
-
پاکستان میں کورونا وائرس ایک بار پھر سر اٹھانے لگا۔ گزشتہ چند ہفتوں کے دوران کورونا کیسز میں تیزی سے اضافہ ہوا۔ ملک کا سب سے بڑا شہر کراچی ایک بار پھر موذی وائرس سے سب سے زیادہ متاثر ہونے لگا۔
کراچی میں گزشتہ 24 گھنٹوں کے دوران کورونا کی شرح میں ریکارڈ اضافہ ہوا۔ ملک کے سب سے بڑی شہر میں کورونا کے مثبت کیسز کی شرح 40 فیصد کے قریب پہنچ گئی ہے۔
محکمہ صحت سندھ کے مطابق کراچی میں گزشتہ 24 گھنٹوں کے دوران کورونا کے 408 ٹیسٹ کئے گئے جس میں سے 161 افراد میں مہلک وائرس کی تشخیص ہوئی۔ اس طرح شہر میں کورونا مثبت کیسز کا تناسب 39 اعشاریہ 46 فیصد ہوگیا۔
دوسری جانب پاکستان میں کورونا وائرس کے کیسز میں مسلسل اضافہ جاری ہے، گزشتہ 24 گھنٹوں کے دوران اس موذی وباء سے 1 کورونا مریض موت کے منہ میں چلا گیا۔
ملک کورونا مریضوں کے حوالے سے مرتب کی گئی فہرست میں 50 ویں نمبر پر ہے، جہاں گزشتہ 24 گھنٹوں کے دوران کورونا کیسزکی شرح 5 اعشاریہ 46 فیصد ریکارڈ کی گئی۔ پاکستان میں گزشتہ 24 گھنٹوں کے دوران مزید 255 افراد میں کورونا وائرس کی تصدیق ہوئی ہے۔
پاکستان بھر میں اب تک 30 ہزار 424 کورونا وائرس کے مریض انتقال کر چکے ہیں جبکہ اس کے کُل مریضوں کی تعداد 15 لاکھ 43 ہزار 505 ہو چکی ہے۔
گزشتہ 24 گھنٹوں میں ملک میں کورونا وائرس کے مزید 4 ہزار 674 ٹیسٹ کیے گئے، جبکہ اب تک کُل 2 کروڑ 92 لاکھ 1 ہزار 395 کورونا ٹیسٹ کیے جا چکے ہیں۔
