-
-
چوبیس برس بعد پاکستان کا دورہ کرنے والی آسٹریلیا کرکٹ ٹیم کے کھلاڑی کھیل کے ساتھ ساتھ دیگر چیزوں سے بھی لطف اندوز ہورہے ہیں۔ آسٹریلوی کرکٹر مارنس لبوشین کو کراچی میں دال روٹی پسند آگئی۔
مارنس لبوشین نے سوشل میڈیا پر دال اور روٹی کی تصویر شیئر کرتے ہوئے لکھا کہ وہ دن کے کھانے میں بھی یہی دال روٹی کھائیں گے کیونکہ یہ بہت ذائقہ دار ہے۔
مارنس لبوشین کے اس ٹوئٹ پر شائقین کرکٹ نے کھل کر اپنی محبت کا اظہار کیا اور انہیں دورہ پاکستان کے ایک ایک پل سے محظوظ ہونے کا کہا ہے۔
اس سے قبل راولپنڈی میں بھی مارنس لبوشین سب سے زیادہ شائقین کی توجہ کا مرکز بنے ہوئے تھے۔ مارنوس لبوشین سے منسلک پوسٹرز پر ان کے مشکل نام یاد کرنے کے حوالے سے لکھا گیا تھا تو کسی پر نام کا تلفظ لکھا گیا تھا۔ لبوشین نے بھی میچ کے اختتام پر ردعمل کا اظہار کرتے ہوئے شائقین کرکٹ کو سراہا۔
ڈیوڈ وارنر نے بھی میچ کے دوران اسٹیڈٰیم میں رقص کرکے مداحوں کو خوب محظوظ کیا تھا۔ آسٹریلوی کرکٹر اپنے پیغامات میں دورہ پاکستان کو یادگار قرار دے رہے ہیں۔
واضح رہے آسٹریلیا کی کرکٹ ٹیم 24 برس کے طویل عرصے بعد پاکستان کا دورہ کررہی ہے۔ اس سے قبل 1998 میں آسٹریلیا نے پاکستان کا دورہ کیا تھا۔
